Shane: Gêm olaf yn erbyn Cymru

Shane Williams Image copyright Getty Images
Image caption Shane Williams cyn ei gêm olaf i Gymru yn erbyn Awstralia

Bydd ymddangosiad olaf Shane Williams ar gae rygbi yn Stadiwm y Mileniwm ar Fehefin 2.

Yr hyn fydd yn rhyfedd yw mai yn erbyn Cymru y bydd yn chwarae.

Mae wedi cael gwahoddiad gan y Barbariaid i wynebu Lloegr, Iwerddon a Chymru yn yr haf.

Cyhoeddodd Shane ei ymddeoliad o rygbi rhyngwladol y llynedd, gan sgorio cais yn erbyn Awstralia yn ei gêm olaf i Gymru ym mis Rhagfyr.

Yn gynharach y mis hwn dywedodd y byddai'n ymddeol o rygbi'n llwyr ar ddiwedd y tymor presennol.

'Dim oedi'

Fe fydd yn ymuno â charfan y Barbariaid fydd yn chwarae yn erbyn Lloegr yn Twickenham ar Fai 27, Iwerddon yn Kingsholm ar Fai 29 a Chymru yng Nghaerdydd ar Fehefin 2.

Dywedodd Shane: "Roedd gorffen chwarae i Gymru ar ôl Cwpan y Byd yn teimlo fel y penderfyniad cywir ac ar ôl cael cyfle i fyfyrio mae'n teimlo'n iawn mai hwn fydd y tymor olaf hefyd.

"Rwy wedi chwarae i'r Barbariaid unwaith o'r blaen a phan ddaeth y gwahoddiad i chwarae yr haf hwn wnes i ddim oedi cyn derbyn.

"Mae'r Barbariaid yn sefydliad gwych sy'n crynhoi popeth sy'n dda am rygbi.

"Mae cael y cyfle i chwarae yn erbyn Cymru yng Nghaerdydd yn gyfle anhygoel ..."

Bydd y chwaraewr 34 oed yn llysgennad gyda'r Gweilch.

Straeon perthnasol