Tafarn yn ennill prif wobr CAMRA

Image copyright Other

Image caption Mae'r dafarn yn gwerthu cwrw o Gymru a'r Gororau

Mae tafarn yn sir Wrecsam wedi ennill cystadleuaeth Tafarn Brydeinig y Flwyddyn.

Mae'r wobr yn cael ei dyfarnu gan y Campaign for Real Ale (CAMRA).

Dyma'r tro cyntaf i dafarn Cymreig gipio'r wobr arbennig yma, sydd yn cael ei beirniadu gan 135,000 o aelodau CAMRA dros flwyddyn gyfan.

Y Bridge End Inn, yn Rhiwabon sydd wedi ennill y wobr eleni.

Dywedodd y tafarnwr, Peter McGivern, ei fod wrth ei fodd ac yn falch iawn bod y dafarn wedi ennill.

Bu'r dafarn ar gau am chwe mis cyn i Mr McGivern ei ailagor dwy flynedd a hanner yn ôl.

"Mae wedi bod yn waith caled ond yn llafur cariad," meddai.

"Roeddwn am greu tafarn y byddwn i'n hoffi mynd iddo a thafarn sy'n canolbwyntio ar gwrw yn hytrach na bwyd.

"Mae gennym saith pwmp llaw ac rydym yn newid y cwrw sydd ar werth yn aml.

Image caption Does dim jiwcbocs na theledu yn y dafarn

"Rydym yn cael cwrw gan tua 100 o fragdai bach, llawer ohonyn nhw yng Nghymru a'r Gororau.

"Yn ogystal rydym yn cynnig seidr lleol o Landegla."

Nid oes jiwcbocs na theledu yn y dafarn.

Y bobl sy'n yfed yno sydd yn creu'r diddanwch yn ôl y tafarnwr.

"Gall bobl siarad a darllen y llyfrau sydd gennym yma," meddai.

Dywedodd Julian Hough, Cyfarwyddwr Tafarndai ar gyfer CAMRA: "Mae'r dafarn yn llwyddiant anhygoel, ac yn esiampl berffaith o dafarn leol sy'n chwarae rhan allweddol wrth galon cymuned fach."

Ychwanegodd Mr McGivern y byddai ennill y wobr yn ennyn diddordeb yn y dafarn.

"Mae'n gyfiawnhad am ein holl waith caled," meddai.