Ryan Giggs yn ymestyn ei gytundeb gyda Manchester United

Mae Ryan Giggs ar fin chwarae gêm rhif 900 dros Manchester United

Mae chwaraewr canol cae Manchester Uited, Ryan Giggs, wedi arwyddo cytundeb a fydd yn ymestyn ei gyfnod gyda'r clwb am flwyddyn arall.

Mae'n golygu y bydd y Cymro 38 oed yn mynd i chwarae am yr 22ain tymor yn Old Trafford.

Fe wnaeth ei ymddangosiad cyntaf i'r clwb ym mis Mawrth 1991.

Mae'n agosau hefyd at chwarae 900 o gemau dros y clwb.

Cyn gêm Manchester United adref yn erbyn Lerpwl ddydd Sadwrn mae Giggs wedi chwarae mewn 898 o gemau dros y tîm ac wedi sgorio 162 o goliau.

"Mae Ryan yn chwaraewr arbennig," meddai rheolwr Manchester United, Syr Alex Ferguson.

"Mewn sawl ffordd mae'n crynhoi fy holl dimau yma ac mae'n ail-ddarganfod ei hun yn gyson ac yn awchu am lwyddiant.

"Mae'n esiampl i bawb mewn pob sesiwn ymarfer a gêm."

Dywedodd Giggs nad oedd erioed wedi credu y byddai wedi chwarae i United am 22 mlynedd pan arwyddodd ei gytundeb cyntaf.

"Mae'n deimlad gwych a dwi'n gwybod y gallaf gyfrannu at ddymuniad y tîm i gael mwy o anrhydeddau.

"Roedd ennill teitl 19 y clwb yn deimlad gwych, ond mae'r clwb yn ymwneud â'r dyfodol a dwi'n falch o fod yn rhan o hynny."

Fe wnaeth ymddeol o chwarae yn rhyngwladol yn 2007 ar ôl ennill 64 o gapiau.