Ail gêm ym Mharc yr Arfau

Parc yr Arfau, Caerdydd Image copyright bbc
Image caption Roedd y gêm ddiwethaf ar y lefel uchaf ym Mharc yr Arfau nos Wener

Fe fydd rhanbarth rygbi Gleision Caerdydd yn chwarae am yr ail dro'r tymor hwn ym Mharc yr Arfau.

Stadiwm Dinas Caerdydd yw cartref swyddogol y Gleision ers 2009.

Ond wedi pryderon am gyn lleied yn gwylio fe chwaraeodd y rhanbarth eu gêm yn erbyn Connacht yn eu hen gartref nos Wener.

Roedd 8,000 yn gwylio'r Gleision yn curo'r tîm o Iwerddon ac fe fydd Ulster yn chwarae yno ddydd Gwener.

Dywedodd Prif Weithredwr y Gleision, Richard Holland, y byddai'r bwrdd yn trafod trefniadau gweddill y tymor ddydd Gwener.

Mae'r Gleision wedi arwyddo cytundeb 20 mlynedd i chwarae yn Stadiwm Dinas Caerdydd, cartref tîm pêl-droed y brifddinas hefyd.

9,000

"Roedd y cefnogwyr yn amlwg yn falch o fynd yn ôl i Barc yr Arfau," meddai Mr Holland.

"Wedi trafod gyda Chyngor Caerdydd, rydym wedi codi uchafswm y gwylwyr i 9,000.

"Fel y dywedais ddydd Gwener ddiwethaf, does 'na ddim bwriad i ddychwelyd yn barhaol.

"Mae gennym ni gytundeb 20 mlynedd gyda Stadiwm Dinas Caerdydd a dyw chwarae'r ddwy gêm hyn ddim yn effeithio ar y cytundeb."

Ychwanegodd bod rhai gemau yn fwy addas ar gyfer stadiwm llai.

Hyd at 11,000

"Fe fyddwn ni'n edrych ar sefyllfa tymor 2012-13," meddai.

Ar y dechrau roedd y rhanbarth yn denu torfeydd o hyd at 11,000 i'r stadiwm newydd sy'n dal tua 25,000.

Ond roedd 2,093 yn gwylio gêm Cwpan LV yn erbyn Harlequins ar Chwefror 5.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.