Medal arian i Geraint Thomas yn Y Felodrom Olympaidd

  • 19 Chwefror 2012
Tîm Prydain enillodd fedal arian Image copyright PA
Image caption Ymhlith y tîm y mae'r Cymro Geraint Thomas

Medal arian gafodd y Cymro Geraint Thomas fel rhan o dîm seiclo Prydain ym Mhencampwriaeth Cwpan Seiclo'r Byd yn Llundain ddydd Sul.

Roedd Thomas ynghyd ag Ed Clancy, Peter Kennaugh a Steven Burke yn wynebu Awstralia yn y Felodrom Olympaidd.

Awstralia oedd wedi cofnodi'r amser cyflyma nos Iau i gyrraedd y rownd derfynol.

Llwyddodd y pedwar o Awstralia, Jack Bobridge, Rohan Dennis, Alex Edmondson a Michael Hepburn i gofnodi'r trydydd amser cyflyma mewn hanes gyda 3 munud 54.615 eiliad.

Amser Prydain oedd 3 munud 56.330 eiliad.

Prydain sydd wedi cofnodi'r ddau amser cyflyma arall, 3:53.314, yn Beijing yn 2008 wrth iddyn nhw ennill y Fedal Aur ac ymgais arall yn 2009.

Prydain oedd ar y blaen i ddechrau.

Ond am weddill y ras, ceisio dal i fyny gydag Awstralia oedd eu hanes.

Fe fydd y canlyniad yn hwb i Awstralia cyn y Gemau Olympaidd yn yr un lleoliad yn yr haf.

Ond fe fydd y ddau dîm yn cystadlu cyn hynny, ym mhencampwriaethau'r byd ym Melborune fis Ebrill.