Pont Britannia: Rhybudd am dresmasu

Pont Britannia Image copyright Other
Image caption Cafodd Pont Britannia ei hadeiladu yn 1846

Mae'r heddlu wedi rhoi rhybudd di-flewyn-ar-dafod yn dilyn honiadau bod pobl yn tresmasu ar Bont Britannia i dynnu lluniau.

Daw rhybudd yr Heddlu Trafnidiaeth wedi i luniau gael eu gosod ar we.

Cafodd rhai o'r lluniau eu tynnu o dan y bont sy'n cysylltu Ynys Môn a Chymru.

Dywed yr heddlu fod y weithred yn "anghyfreithlon ac yn beryglus iawn."

Mae'r bont yn cael ei defnyddio gan geir a threnau.

Dywedodd llefarydd nad oeddynt yn ymwybodol o bobl yn tresmasu a thynnu lluniau ar safleoedd amlwg eraill yng Nghymru.

Peryglus

Yn Lloegr, mae enghreifftiau o bobl yn tresmasu a thynnu lluniau o safleoedd gan gynnwys ffatrïoedd gwag, hen iardiau llongau a thwneli.

Cafodd Pont Britannia, sy'n adeilad rhestredig Gradd II, ei hadeiladu gan Robert Stephenson yn ystod yr 1840au.

Dywedodd llefarydd ar ran yr heddlu: "Rydym yn ymchwilio troseddau tresmasu posib ar ôl clywed am luniau, mae'n debyg, gafodd eu tynnu o Bont Britannia sydd wedi ymddangos ar y we.

"Mae tresmasu ar unrhyw ran o reilffordd yn anghyfreithlon ac yn beryglus iawn."

Cafodd y bont ei difrodi gan dân ym 1970 cyn cael ei hail agor i drenau ym 1972, ac i gerbydau ym 1980.

Dylai unrhyw un â gwybodaeth ynglŷn â'r lluniau gysylltu â'r Heddlu Trafnidiaeth ar 0800 405040.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.