Jenkins i chwarae yn Ffrainc

Gethin Jenkins Image copyright Huw Evans picture agency
Image caption Bydd Gethin Jenkins yn chwarae yn Ffrainc

Daeth cadarnhad y bydd prop y Gleision, Gethin Jenkins, yn ymuno â Toulon ar gytundeb dwy flynedd.

Ef yw'r diweddara o chwaraewyr Cymru i symud i Ffrainc.

Mae'r chwaraewyr rhyngwladol Mike Phillips, James Hook a Lee Byrne eisoes yn chwarae ar y cyfandir, ac mae'r asgellwr Aled Brew newydd gytuno i ymuno â Biarritz.

'Dim dewis'

Mae sôn hefyd fod Perpignan yn targedu'r clo rhyngwladol, Luke Charteris.

Dywedodd Jenkins y bydd yn gadael y Gleision ddiwedd y tymor.

"Byddai'n bendant yn gadael ac ydw, rwy'n mynd i Ffrainc," meddai Jenkins wrth bapur newydd y Western Mail.

Dywedodd Jenkins ei bod wedi dod i'r amlwg nad oedd ei glwb am ei dalu tra'i fod ar ddyletswyddau rhyngwladol.

"Roeddwn yn teimlo nad oedd dewis yn y diwedd," meddai.

Mae Jenkins, sy'n 31 oed, wedi ennill 84 o gapiau rhyngwladol.

Straeon perthnasol