Meddyg teulu yn gyrru cyn y ddamwain a'i lladdodd

Roedd Dr Gwion Rhys ar ei ffordd i'w feddygfa pan fu'r gwrthdrawiad

Bu farw meddyg teulu wedi damwain ar ffordd wledig ym Mhen Llŷn ym mis Gorffennaf am ei fod yn gyrru yn rhy gyflym i'r amgylchiadau ar y pryd.

Bu Dr Gwion Rhys, 38 oed o Lanarmon, Pwllheli, mewn gwrthdrawiad â thractor toc cyn ei fod i gynnal meddygfa'r prynhawn.

Clywodd y cwest yng Nghaernarfon ddydd Mercher fod Dr Rhys wedi bod mewn diwrnod mabolgampau ysgol cyn y ddamwain ar y B4354 ym Mhentre Uchaf ger Pwllheli.

Fe wnaeth y crwner, Dewi Pritchard-Jones, gofnodi rheithfarn o farwolaeth drwy ddamwain.

Fe wnaeth car Audi Dr Rhys wrthdaro gyda thractor a hynny ger troad yn y ffordd.

Clywodd y cwest bod llwyth y tractor 1.2 metr oddi ar y ddaear er mwyn i'r gyrrwr 17 oed weld y ffordd.

Ond roedd breichiau'r tractor wedi chwalu ochr teithiwr yr Audi.

Roedd gyrrwr y tractor yn troi i'r dde mewn cyffordd pan ddigwyddodd y ddamwain.

Dywedodd y patholegydd Dr Mark Lord y byddai Dr Rhys wedi marw yn syth.

Clywodd y cwest bod gyrwyr eraill wedi gweld yr Audi yn goddiweddyd ar gyflymder yn fuan cyn y ddamwain a hynny er eu bod nhw yn gwneud rhwng 40 a 50 milltir yr awr.

Roedd Dr Rhys yn enedigol o bentre Bow Street yng Ngheredigion.

Bu'n feddyg teulu yn ardal Nefyn a Llanaelhaearn am 10 mlynedd.

Mae'n gadael gwraig, pedwar o blant, rhieni a brawd.