Gollwng dros hanner honiadau yn erbyn athrawon

Mae dros hanner yr honiadau yn erbyn athrawon a chynorthwywyr dysgu gan ddisgyblion yng Nghymru wedi bod yn anghywir, maleisus neu ddi-sail.

Mae ffigyrau a gafwyd gan BBC Cymru o dan y Ddeddf Rhyddid Gwybodaeth yn dangos bod 55% o'r 312 o honiadau wedi cael eu gollwng.

Mae undebau athrawon yn dweud bod angen cymryd camau yn erbyn disgyblion sy'n gwneud honiadau maleisus neu ddi-sail.

Dywedodd Llywodraeth Cymru eu bod wrthi yn diweddaru eu canllawiau ar y pwnc, ond ei fod yn bwysig i gymryd honiadau plant o ddifrif ac annog plant gyda chwynion go iawn i ddweud eu dweud.

Mae Comisiynydd Plant Cymru, Keith Towler, wedi galw ar Lywodraeth Cymru i gyhoeddi eu canllawiau newydd "fel mater o frys".

Mae'r ffigyrau yn dangos rhwng 2006 a 2011, fe wnaed 312 o honiadau yn erbyn athrawon a chynorthwywyr dysgu gan ddisgyblion yng Nghymru.

55.7%

Ond cafwyd bod 174 ohonynt, neu 55.7%, yn anghywir, maleisus neu ddi-sail.

Fe wnaeth yr heddlu ymchwilio i 103 achos a chafwyd dau athro neu gynorthwywyr yn euog o drosedd.

O'r bobl a oedd yn wynebu cyhuddiadau, cafodd 121 eu hatal o'r gwaith tra roedd ymchwiliad ar y gweill.

Mae undebau'r NUT a NASUWT yn dweud y gallai'r broblem fod yn waeth nag y mae'r ffigyrau yn awgrymu.

Nid oedd tri chyngor - Abertawe, Ceredigion a Chaerffili - yn medru darparu ffigyrau ar y pwnc ac roedd rhai ond yn medru rhoi ffigyrau am yr ychydig flynyddoedd diwethaf.

'Hunllef'

"Mae hyn yn destun pryder i ni ac i athrawon," meddai Rex Phillips o undeb y NASUWT.

"Hunllef waethaf pob athro neu athrawes yw cael honiadau ffug yn eu herbyn.

"Y cwbl rydym yn gofyn yw i athrawon gael eu trin yn deg.

"Unwaith i honiad gael ei wneud, mae athrawon yn aml yn cael eu hatal o'u gwaith ar unwaith heb unrhyw ystyriaeth i wirionedd yr honiad.

"Does dim 'dieuog tan y profir yn euog'."

Dywedodd Comisiynydd Plant Cymru, Keith Towler: "Dylai ystafelloedd dosbarth fod yn llefydd diogel i athrawon ac i ddisgyblion.

"Mae angen i Lywodraeth Cymru gyhoeddi eu canllawiau newydd "fel mater o frys".

Dywedodd Llywodraeth Cymru: "Ni ddylwn wneud unrhyw beth a allai tanseilio hawl plant i gael eu clywed a rhaid annog rhai gyda chwynion go iawn i ddweud eu dweud.

"Rydym wrthi yn diweddaru ein canllawiau ar y pwnc".

Honiadau yn erbyn athrawon a chynorthwy-wyr dosbarth 2006-2011
Cyngor Honiadau Anghywir, maleisus neu ddi-sail
Ynys Môn 8 Ffigyrau ddim ar gael
Blaenau Gwent 24 19
Pen-y-bont ar ogwr 8 0
Caerffili Ffigyrau ddim ar gael
Caerdydd 42 11
Sir Gaerfyrddin 11 5
Ceredigion Ffigyrau ddim ar gael
Conwy 2 (ffigyrau 2009-10) 2
Sir Ddinbych 16 12
Sir y Fflint 6 Ffigyrau ddim ar gael
Gwynedd 15 (ffigyrau 2009-10) 15
Merthyr Tudful 23 21
Sir Fynwy 7 2
Castell-nedd Port Talbot 2 (ffigyrau 2009-11) 1
Casnewydd 35 25
Sir Benfro 7 Ffigyrau ddim ar gael
Powys 13 (ffigyrau 2009-11) 7
Rhondda Cynon Taf 23 6
Abertawe Ffigyrau ddim ar gael
Torfaen 18 (ffigyrau 2009-11) 18
Bro Morgannwg 37 26
Wrecsam 15 4
Cyfanswm yng Nghymru 312 174

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.