BBC Cymru Fyw

Bennett yn mynd i Ffrainc

Published
image copyrightHuw Evans picture agency
image captionBennett:Bydd yn chwarae yn Lyon y tymor nesa
Mae bachwr y Gweilch, Huw Bennett, wedi dweud ar wefan Twitter ei fod yn ymuno â chlwb Lyon yn Ffrainc ar ddiwedd y tymor.
Yr wythnos ddiwethaf, cyhoeddodd y prop Gethin Jenkins y bydd yntau'n gadael y Gleision er mwyn ymuno â chlwb Toulon ar gytundeb dwy flynedd.
Bennett yw'r diweddara' o enwau mawr y Gweilch i adael.
'Dymuno'n dda'
Mae Mike Phillips, James Hook a Lee Byrne eisoes yn chwarae yn Ffrainc.
"Dwi'n edrych ymlaen at sialens newydd o chwarae yn Ffrainc gyda Lyon," meddai Bennett ar Twitter.
"Tan hynny byddaf yn llwyr ymroddedig i orffen y tymor ar nodyn uchel," ychwanegodd.
"Rwyf eisiau diolch i'r Gweilch a'r cefnogwyr anhygoel am naw mlynedd wych."
Dywedodd hyfforddwr blaenwyr y Gweilch, Jonathan Humphreys, "fod yna bosibilrwydd cryf y bydd Bennett yn gadael".
"Pe bai e'n mynd, yna byddwn yn dymuno'n dda iddo."
Ar ddiwedd y tymor mae disgwyl y bydd yr asgellwr Tommy Bowe yn gadael y Gweilch gan ymuno ag Ulster, tra bydd y blaenwr Tom Smith yn ymuno â'r Gwyddelod yn Llundain.
Hefyd bydd yr asgellwr Shane Williams yn ymddeol.
Mae'r Gweilch, fel rhanbarthau eraill Cymru, nawr yn gorfod dygymod â gosod cap cyflogau o £3.5 miliwn ar gyfer y tymor nesaf.
Yn ôl sylwebyddion, bydd hi'n anodd i ranbarthau Cymru gystadlu â thimoedd Ffrainc a Lloegr wrth gynnig cytundebau cystadleuol.