Cyn-chwaraewyr yn talu teyrnged i Gary Speed

Sgoriodd Gary Speed saith gôl mewn 44 gêm dros Gymru

Bydd llu o gyn-chwaraewyr rhyngwladol Cymru yn talu teyrnged i Gary Speed mewn gêm goffa iddo.

Bydd Ryan Giggs, John Hartson, Mark Hughes, Neville Southall a Robbie Savage ymysg y 50 o sêr pêl-droed fydd yn cael eu cyflwyno i'r dorf yn ystod hanner amser y gêm yn erbyn Costa Rica yn Stadiwm Dinas Caerdydd nos Fercher.

Mae dros 21,000 o docynnau wedi'u gwerthu a gobaith y Gymdeithas yw y bydd y stadiwm yn orlawn.

Mae Cymdeithas Bêl-Droed Cymru wedi dweud y bydd y digwyddiad yn ddathliad o fywyd Speed.

Fe fydd 'na nifer o artistiaid cerddorol yn cymryd rhan cyn y gêm gan gynnwys Super Furry Animals, Bryn Terfel, Mike Peters, Courtney Hamilton ac Only Men Aloud.

Mae disgwyl i dad Speed, Roger, ddweud gair wrth y chwaraewyr cyn y gêm a meibion y cyn-reolwr, Ed a Tommy, fydd yn arwain y tîm i'r cae.

Elusennau

Bydd nifer o elusennau ac achosion da yn elwa o'r gêm goffa.

Bydd elusen cymorth canser Macmillan; C.A.L.M., The Daisy Garland, Academi Bechgyn Dan 15 Clwb Pêl-Droed Wrecsam a Sefydliad Craig Bellamy yn elwa yn ariannol neu yn ymarferol.

Cafodd pob un o'r elusennau eu henwebu gan deulu Speed.

Bu farw Speed ym mis Tachwedd y llynedd yn 42 oed.

Cafwyd hyd i'w gorff yn ei gartref ger Caer ar Dachwedd 27.

Dywedodd crwner ddiwedd mis Ionawr na allai gasglu a oedd ei farwolaeth yn fwriadol neu'n ddamweiniol.

Roedd ei farwolaeth yn anghrediniaeth drwy'r gymuned bêl-droed.

Ymgasglodd cefnogwyr yn eu galar i dalu teyrnged i gyn-gapten Cymru a fu'n chwarae i glybiau Leeds, Newcastle, Everton, a Bolton.

Enillodd fwy o gapiau dros Gymru, 85, na neb arall ac eithrio'r gôl-geidwad Neville Southall.

Cyn rheoli Cymru bu'n rheoli Sheffield United.

Wedi dechrau anodd roedd y tîm o dan ei reolaeth wedi ennill pedair o'u pum gêm ddiwethaf.

Y fuddugoliaeth yn erbyn Norwy o 4-1 ar Dachwedd 12 oedd ei gêm olaf - y drydedd fuddugoliaeth yn olynol.