Chris Coleman am i Ben Turner chwarae dros Gymru

Ben Turner Image copyright Other
Image caption Sgoriodd Turner ail gôl yr Adar Gleision yn erbyn Lerpwl ddydd Sul

Mae'n debygol y bydd Chris Coleman yn gofyn i Ben Turner ymrwymo'i hun i chwarae pêl-droed rhyngwladol dros Gymru.

Mae amddiffynnwr Caerdydd wedi'i gymhwyso i chwarae dros Gymru am fod ei fam-gu yn Gymraes ac mae sgowtiaid y tîm cenedlaethol eisoes wedi bod yn gwylio cyn-chwaraewr dan 19 oed Lloegr.

Turner oedd un o chwaraewyr gorau'r Adar Gleision wrth iddyn nhw golli yn erbyn Lerpwl yn rownd derfynol Cwpan Carling ddydd Sul.

Gofynnodd hyfforddwr tîm ieuenctid Cymru Brian Flynn i Turner chwarae dros Gymru ddwy flynedd yn ôl.

Ond ar y pryd allai'r amddiffynnwr 6 troedfedd 4 modfedd o daldra, a gafodd ei eni yn Birmingham, gynnig tystiolaeth fod 'na dras Gymreig.

'Gêm wych'

Ond mae disgwyl i reolwr newydd Cymru, Coleman, a Chymdeithas Bêl-Droed Cymru gysylltu â Turner i gadarnhau ei fod yn gymwys i chwarae dros Gymru.

Erbyn hyn mae Turner, sgoriodd ail gôl Caerdydd yn erbyn Lerpwl, wedi dweud bod dau o'i deidiau a neiniau o dras Gymreig.

Ond nid yw am ymrwymo ei hun i chwarae dros Gymru tan i Coleman a'r Gymdeithas ofyn iddo'n swyddogol.

"Roeddwn i'n meddwl bod Turner wedi cael gêm wych yn erbyn Lerpwl ac ef oedd un o'r chwaraewyr gorau ar y cae," meddai Coleman.

Byddai Turner yn atgyfnerthu carfan Cymru gan ymuno ag amddiffynwyr fel James Collins, Danny Gabbidon a Danny Collins.

Gallai Turner chwarae dros ei wlad am y tro cyntaf yn y gêm gyfeillgar yn erbyn Mecsico ar Fai 27 yn Efrog Newydd pe na bai Caerdydd yn chwarae yn gemau ail gyfle'r Pencampwriaeth.

'Llwyddiant'

Image copyright (C) British Broadcasting Corporation
Image caption Roedd Craig Bellamy yn agos at gyn-reolwr Cymru Gary Speed

Yn y cyfamser mae capten y tîm rhyngwladol, Aaron Ramsey wedi annog Craig Bellamy i barhau i chwarae dros Gymru.

Mae Bellamy yn ystyried ei ddyfodol fel chwaraewr rhyngwladol.

Ond mae Ramsey am i ymosodwr Lerpwl chwarae dros ei wlad tan ddiwedd ymgyrch Cymru yn gemau rhagbrofol Cwpan y Byd 2014.

"Mae Craig wedi bod yn rhan bwysig iawn o'n llwyddiant," meddai Ramsey.

"Mae e wedi profi fod ganddo'r ddawn i fygwth amddiffynwyr ac mae ganddo lawer o brofiad.

"Rydym yn gobeithio y bydd e'n penderfynu parhau i chwarae am fod ganddo lawer i gynnig a gallai chwarae rhan allweddol o ran llwyddiant Cymru yn y dyfodol."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.