Penwythnos o ddigwyddiadau cerddorol

Cerddorwyr Image copyright Other
Image caption Mae cerddorion amaturaidd a phroffesiynol yn rhan o'r digwyddiad dros y penwythnos

Mae mwy na 1,000 o gerddorion o Gymru'n cymryd rhan mewn digwyddiad Prydeinig.

Bydd cyngherddau a pherfformiadau ar Fawrth 3 a 4 yn rhan o'r Olympiad Diwylliannol.

Mae Opera Cenedlaethol Cymru wedi trefnu cyfres o berfformiadau wedi eu hysbrydoli gan gerddoriaeth Cymru.

Yng Nghaerdydd, Caernarfon a Wrecsam mae première byd wedi ei drefnu gan y cyfansoddwr John Hardy a'r darn cerddorol yn cynnwys cerddoriaeth Catatonia, The Manic Street Preachers a gwaith Priodas Figaro.

Mae'r digwyddiad yn agored i unrhyw un ac mae copïau o'r gerddoriaeth ar gael i'w lawrlwytho o wefan Opera Cenedlaethol Cymru.

Yn y cyfamser, mae Sinfonia Cymru, y mae eu canolfan yng Nghaerdydd, yn mynd i Gaernarfon a'r Wyddgrug, ac Ensemble Cymru, y mae eu canolfan ym Mangor, yn perfformio yng Nghasnewydd a Cheredigion.

Image copyright Other
Image caption Mae Opera Cenedlaethol Cymru eisoes wedi perfformio ar strydoedd Wrecsam

Yn ystod y penwythnos mae première darn comisiwn i'r BBC gan y cyfansoddwr Karl Jenkins, Songs of the Earth.

Cerddorfa a Chorws Cenedlaethol Cymreig y BBC sy'n perfformio.

Ymhlith digwyddiadau eraill mae Creu Cerddoriaeth Cymru a'r Tŷ Cerdd yn arwain y Gymanfa Ganu Genedlaethol.

Hefyd mae Coleg Brenhinol Cerdd a Drama Cymru yn gwahodd enillwyr Cerddor Ifanc y Flwyddyn y BBC i berfformio yn ei neuadd gyngerdd newydd.

Dywedodd Cyfarwyddwr BBC Cymru, Rhodri Talfan Davies: "Rwyf wrth fy modd fod BBC Cymru Wales a Cherddorfa Genedlaethol Gymreig y BBC yn gweithio ochr yn ochr â chynifer o bartneriaid ardderchog i gyflwyno'r penwythnos hudol o ddigwyddiadau ar hyd a lled Cymru.

Mae'n addo bod yn ddathliad cofiadwy diwylliant a cherddoriaeth yr oes sydd ohoni."

Mae rhestr lawn digwyddiadau'r penwythnos ar wefan Radio 3.

Hefyd ar y BBC

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.