Perfformiad oratorio newydd gan Pwyll ap Siôn a Menna Elfyn

Pobl leol sydd yn canu yn y côr

Bydd oratorio gan y cyfansoddwr Pwyll ap Siôn yn cael ei pherfformio am y tro cyntaf erioed yng Nghaernarfon nos Lun.

Comisiynwyd Gair ar Gnawd gan Opera Cenedlaethol Cymru (OCC).

Ysgrifennwyd geiriau'r oratorio gan y bardd Menna Elfyn ac roedd pob ymarfer yn Gymraeg - y tro cyntaf i'r cwmni wneud hyn.

Bydd y prif rannau yn cael eu canu gan ddau aelod o Gorws OCC, sef Siân Meinir (Awen) a Philip Lloyd Evans (Anwar).

Hefyd bydd côr o 40 o gantorion o'r gymuned leol yn canu yn y ddrama operatig gyfoes.

Byd gwell

Mae Gair ar Gnawd yn adrodd stori am ymrafael tebyg i Dafydd a Goliath rhwng datblygwyr casino mawr a chymuned leol sydd â'u bywoliaeth yn cael ei bygwth.

"Mae'n ymwneud ag iaith, ardal, hunaniaeth a'r hyn rydyn ni'n credu ynddo," meddai Pwyll ap Siôn.

Mae Siân Meinir yn canu rhan Awen yn y ddrama operatig

"Ond mae hefyd yn ymwneud â phobl yn dod ynghyd ac yn gweithio i wneud y byd yn lle gwell.

"Mae hyn i gyd yn digwydd drwy ddau brif gymeriad, Awen, sy'n datŵydd ac Anwar, sydd wedi cyfieithu'r Beibl i bob iaith yn y byd."

Bydd Gair ar Gnawd yn cael ei pherfformio am y tro cyntaf erioed yn Galeri nos Lun Mawrth 12 am 7.30pm, perfformiad fydd yn cael ei noddi gan Pendine Park, y sefydliad gofal.

Dydd Sul Mawrth 18 bydd cyfle arall i weld y cynhyrchiad yn Y Stiwt, Wrecsam am 5pm.