Abertawe 1-0 Manchester City

Does yr un tîm o'r Uwchgynghrair wedi edrych ymlaen i'w hymweliad â Stadiwn Liberty y tymor hwn, ac felly y profodd hi yn gynnar yn y gêm i'r tîm ar y brig.

Yn y munud agoriadol fe gafodd yr Elyrch gic o'r smotyn gan y dyfarnwr am drosedd gany golwr Joe Hart ar Wayne Routledge.

Ond cododd golwr Lloegr ar ei draed i arbed cynnig gwan Scott Sinclair o'r smotyn.

O'r gic gornel ddaeth o hynny, fe gafodd Abertawe gyfle arall, ond roedd Hart yno eto i arbed peniad Ashley Williams.

Fel sy'n arferol mewn gemau yn Stadiwm Liberty y tymor hwn, y tîm cartref oedd yn mwynhau mwyafrif y meddiant.

Ond er i'r ddau dîm gael cyfleoedd o flaen gôl doedd yr un o'r ddau yn medru manteisio arnynt.

Roedd rhai o chwaraewyr Manchester City yn gandryll pan na chafon nhw gic o'r smotyn yn yr ail hanner am drosedd honedig ar Mario Balotelli, ond roedd y camerâu teledu'n awgrymu mai'r dyfarnwr oedd yn gywir.

Wrth i brofiad yr ymwelwyr ddod i'r amlwg, Michel Vorm oedd y prysuraf o'r ddau golwr yn yr ail gyfnod gydag arbedion o gynigion Clichy a Nasri.

Ond y pen arall y daeth digwyddiad allweddol y gêm.

Wrth i amddiffyn yr ymwelwyr simsanu, daeth y bêl at Wayne Routledge mewn digonedd o le ar yr asgell, a daeth ei groesiad o hyd i ben yr eilydd Luke Moore i benio i'r rhwyd.

Gydag Abertawe ar y blaen, fe ymosododd yr ymwelwyr mewn tonnau, ac fe gawson nhw'n bêl i'r rhwyd dim ond i'r dyfarnwr cynorthwyol nodi bod Micah Richards yn camsefyll.

Mae record Abertawe ar y Liberty yn parhau i fod yn wych, ac roedd y canlyniad yn ergyd i obeithion Manchester City o godi'r bencampwriaeth.

Yn bwysicach i dîm Brendan Rodgers, mae'r Elyrch yn codi i'r 11eg safle, ac yn llawer sicrach o'u lle yn y brif adran y tymor nesaf.

TABL YR UWCHGYNGHRAIR
Gemau Gwahaniaeth Goliau Pwyntiau
1. Man United 28 +41 67
2. Man City 28 +49 66
3. Tottenham 28 +18 53
4. Arsenal 27 +17 49
-----------------------------------------------------------------------------------------
11. ABERTAWE 28 -3 36

Straeon perthnasol