Trosglwyddo dau i lywodraeth Libya

Cafodd Gareth Montgomery-Johnson (chwith) a Nicholas Davies-Jones eu dal ym mis Chwefror

Mae dyn camera o Gaerfyrddin a newyddiadurwr arall o Brydain gafodd eu harestio'n Libya bellach wedi eu trosglwyddo i lywodraeth y wlad.

Roedd Gareth Montgomery-Johnson a Nicholas Davies-Jones o Berkshire wedi eu cyhuddo o ysbio.

Yn ôl un o swyddogion y llywodraeth, fe fyddan nhw'n cael eu rhyddhau os ydyn nhw'n ddieuog.

Mae Mr Montgomery-Johnson yn gweithio i rwydwaith teledu Iran, Press TV, ac mae honiadau ei fod wedi wynebu "artaith feddyliol".

Yn gynharach yr wythnos hon, dywedodd chwaer Mr Montomery-Johnson, 36 oed, mai prin yr oedd yn adnabod ei lais ar y ffôn.

Dywedodd Mel Gribble mai dydd Sul oedd y tro cyntaf iddi siarad ag ef ers iddo gael ei ddal dair wythnos yn ôl.

'Ddim yn swnio'

"Roedd yn fater o frys i gael cymaint o wybodaeth â phosib ar y ffôn," meddai'r chwaer.

"Ac roedd 'na sŵn yn y cefndir ac 'Ie' neu 'Na' oedd yr ateb yn bennaf.

"Doedd e ddim yn swnio fel Gareth ac roedd rhaid iddo ddweud pwy oedd e ar y cychwyn.

"Roedd ei lais yn llawn emosiwn."

Mae Faraj al-Swehli yn honni bod y newyddiadurwyr yn ysbiwyr

Dywedodd wrth ei chwaer nad oedd yn cael ei gam-drin yn gorfforol ond pan ofynnodd hi a oedd yn wynebu artaith feddyliol, ei ateb oedd: "I radde helaeth ..."

"Wedi i mi egluro beth oedd yn cael ei wneud yma a bod y lefel ucha' yn delio â'r mater ofynnais a oedd rhywbeth arall y gallwn i ei wneud.

"Ei ateb oedd 'dal i ymdrechu'."

Mae arweinydd y milisia, Faraj al-Swehli, wedi dweud bod y ddau wedi dod i mewn i Libya yn anghyfreithlon a'u bod yn cario "tystiolaeth ddamniol".

Eisoes mae wedi dangos "tystiolaeth" i newyddiadurwyr yn y wlad fod y ddau'n tanio drylliau.