Chwe bws ysgol a thacsi'n anniogel

Mae chwe bws ysgol a thacsi sy'n cludo plant i'r ysgol wedi methu archwiliad diogelwch wrth i'r heddlu gynnal ymgyrch.

Cyflwynwyd hysbysiadau gwahardd y tu allan i Ysgol Glan Clwyd yn Llanelwy ac Ysgol Emrys ap Iwan yn Abergele ddydd Llun.

Yr heddlu a'r Asiantaeth Gwasanaethau Cerbydau a Gweithredwyr oedd yn archwilio.

Dywedodd y Prif Arolygydd Darren Wareing o Heddlu'r Gogledd y byddai archwiliadau ym mhob un o siroedd y rhanbarth.

Anghyfreithlon

Cafodd hysbysiadau gwahardd eu cyflwyno oherwydd stad tri bws a thacsi yn Llanelwy.

Cyflwynwyd tri oherwydd teiars anghyfreithlon a chyflwynwyd un am fod panel allanol bws yn llac.

Cafodd tri hysbysiad eu cyflwyno ohewrydd teiars anghyfreithlon tri bws yn Abergele.

Bydd rhaid i'r cwmnïoedd sicrhau bod y bysiau a'r tacsi yn ddiogel cyn iddyn nhw gael eu gyrru.

Dywedodd Mr Wareing: "Rydym am sicrhau bod plant yn cael eu cludo'n ddiogel i'r ysgol ac o'r ysgol.

"Mae gyrwyr, gweithredwyr ac ysgolion wedi cydweithio â ni ond gall unrhyw un nad ydyn nhw'n cydymffurfio â'r gwaharddiadau gael ei erlyn."