Wrecsam a Chasnewydd yn colli

Image copyright Other

Wrecsam 1-2 Forest Green Rovers

Cafodd Wrecsam glec i'w gobeithion o ennill Uwchgynghriar Blue Square ar ôl colli i Forest Green Rovers ddydd Sadwrn.

Mae Fleetwood wedi agor bwlch naw pwynt ar frig y tabl wedi iddynt guro Mansfield o ddwy gôl i ddim ddydd Sadwrn.

Er bod gan Wrecsam ddwy gêm wrth gefn fe fydd Fleetwood yn dal tri phwynt y tu blaen i'r Dreigiau pe baen nhw'n ennill y ddwy gêm hynny.

Mae'n ymddangos mai gobaith gorau Wrecsam o ennill yr Uwchgynghrair yn awr yw curo Fleetwood pan fydd y ddau dîm yn herio'i gilydd yn Fleetwood ar Ebrill 10.

Wrecsam sgoriodd gôl gynta'r gêm ar y Cae Ras ddydd Sadwrn pan rwydodd Jake Speight gyda chic o'r smotyn ar ôl 20 munud wedi i Jamie Collins faglu Mark Creighton yn y cwrt cosbi.

Ond cosbodd yr ymwelwyr waith amddiffynol llac gan y Dreigiau pan sgoriodd Matt Taylor ar ôl 64 munud.

Aeth pethau o ddrwg i waeth i Wrecsam pan sgoriodd James Norwodd ail gôl Forest Green Rovers yn funud ola'r gêm i sicrhau buddugoliaeth i'r ymwelwyr.

Hwn oedd y tro cyntaf i Wrecsam golli gêm gartref yn yr Uwchgynghrair ers mid Medi'r llynedd.

Clwb Pêl-droed Casnewydd Image copyright Other

Lincoln 2-0 Casnewydd

Ben arall y tabl fe gafodd Casnewydd glec i'w gobeithion hwythau o aros yn yr adran y tymor hwn.

Bellach mae'r Alltudion pwynt yn unig yn uwch na'r pedwar isaf fydd yn disgyn ar ddiwedd y tymor, er bod ganddynt gemau wrth gefn dros eu gwrthwynebwyr.

Mark McCammon sgoriodd gôl gyntaf Lincoln pan rwydodd yr ymosodwr gyda'i ben wedi 25 munud.

Dyblodd y tîm cartref eu mantais wyth munud yn ddiweddarach pan rwydodd Nutter â chic rydd.

Er bod Casnewydd wedi cyrraedd rownd derfynol Tlws yr FA mae'r Alltudion bellach heb ennill dim un o'u pum gêm ddiwethaf yn y gynghrair.

TABL UWCHGYNGHRAIR BLUE SQUARE BET
Gemau Gwahaniaeth Goliau Pwyntiau
1. Fleetwood 40 +54 95
2.WRECSAM 38 +48 86
3. Mansfield 40 +27 71
4. Southport 39 +4 69
5. Luton 38 +31 67
-----------------------------------------------------------------------------------------
18.Telford 39 -19 37
19.Lincoln 38 -15 36
20.CASNEWYDD 37 -11 35
21.Hayes 39 -28 34
22.Kettering 40 -46 32
23.Darlington 38 -19 29
24.Caerfaddon 39 -42 24

Straeon perthnasol