BBC Cymru Fyw

Dringwr yn sownd am fwy na thair awr

Published
image copyrightNot Specified
Cafodd dringwr ei ddal am dair awr a hanner ar ben rhaff pan aeth ei fraich yn sownd ar graig uwchben bwlch Llanberis yn Eryri.
Roedd y dyn 28 oed o Aberdyfi yn rhan o grŵp o bedwar pan ddisgynnodd ychydig droedfeddi a mynd yn sownd ddydd Sul.
Digwyddodd ar ddringfa rhyw 1,000 o droedfeddi ar Ddinas Cromlech.
Cafodd y dringwr y cyffur morphine i leddfu'r boen cyn cael ei rhyddhau a'i gludo i Ysbyty Gwynedd ym Mangor.
Roedd ei gyfeillion wedi ceisio ei rhyddhau am awr cyn ffonio am gymorth.
Aeth aelodau o dîm achub mynydd Llanberis i'r safle, a daeth hofrennydd yr heddlu ag achubwyr ogofâu arbenigol o Sir y Fflint. Bu diffoddwyr tân hefyd yno'n cynorthwyo.