Gwaith Graham Sutherland i'w weld yn Sir Benfro

Cyhoeddwyd
Ffynhonnell y llun, Other
Disgrifiad o’r llun,
Y traddodiad Rhamantaidd Seisnig oedd ysbrydoliaeth wreiddiol Sutherland

Disgrifiwyd Graham Sutherland fel "arlunydd gorau ei genhedlaeth".

Mewn arddangosfa mae detholiad o'i waith a gwrthrychau o'r archifau sy'n gysylltiedig â'r arlunydd i'w gweld yn Sir Benfro.

Daw'r cynnwys o gasgliad Amgueddfa Cymru a bydd yn Oriel y Parc, Tyddewi, o Ebrill 1 tan ddiwedd mis Mehefin.

Y traddodiad Rhamantaidd Seisnig oedd ei ysbrydoliaeth wreiddiol ond datblygodd agwedd bersonol at natur a oedd yn deillio o gelf fodern Ewropeaidd.

'Ysbrydoliaeth'

Cafodd y llefydd y bu'r artist yn gweithio ynddyn nhw ddylanwad mawr ar ei waith: o dirwedd Caint i fryniau a chymoedd gorllewin Cymru a gwres a golau de-ddwyrain Ffrainc.

Roedd yn awyddus i adael casgliad i Gymru am ei fod yn teimlo iddo "gael cymaint oddi wrth y wlad hon, hoffwn roi rhywbeth yn ôl".

Dywedodd Bryony Dawkes, Curadur Prosiectau Partneriaeth, Amgueddfa Cymru: "Arfordir anhygoel Sir Benfro oedd yr ysbrydoliaeth ar gyfer rhai o weithiau mwyaf poblogaidd Sutherland.

"Mae'r arddangosfa hon yn dathlu gwaith Sutherland a'r dirwedd arbennig hon.

"Rydym yn gobeithio y bydd ymwelwyr ag Oriel y Parc yn mwynhau'r gweithiau gwych o gasgliad Amgueddfa Cymru yn yr ardal a chwaraeodd ran mor bwysig yng nghreadigrwydd yr artist."

Awdurdod Parc Cenedlaethol Arfordir Penfro ac Amgueddfa Cymru sy'n rheoli'r oriel.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol