Hwb i beirianneg sifil yng Nghymru
- Cyhoeddwyd
Mae ymgyrch newydd yn gobeithio rhoi hwb i beirianneg sifil yng Nghymru ac annog mwy o bobl i weithio yn y maes.
Bydd yr ymgyrch yn cael ei lansio gan Weinidog Amgylchedd Cymru, John Griffiths AC, yn ystod ymweliad â chynllun amddiffyn arfordirol Gorllewin Rhyl ddydd Iau.
Sefydliad y Peirianwyr Sifil (ICE) sy'n gyfrifol am yr ymgyrch, a'r nod yw rhoi mwy o wybodaeth i'r cyhoedd am waith peirianwyr sifil trwy ddefnyddio baneri ac arwyddion ar safleoedd yn ystod y broses adeiladu.
Mae'r baneri a'r arwyddion yn cynnwys cod-bar arbennig sy'n cysylltu i dudalennau ar wefan y Sefydliad, sy'n egluro beth yw peirianneg sifil a beth mae peirianwyr sifil yn ei wneud.
Mae hefyd yn cynnwys cysylltiadau i wybodaeth am sut i ddilyn gyrfa fel peiriannydd sifil.
Fel rhan o gynllun peilot, roedd nifer o safleoedd ar draws Cymru eisoes wedi bod yn arddangos y baneri a'r arwyddion hyn - o gynlluniau amddiffyn arfordirol yng ngogledd Cymru, i lwybr beicio yn ne ddwyrain Cymru, prosiect adfer cwymp tir yng ngorllewin Cymru a chynllun priffyrdd yn Abertawe.
'Problem gynyddol'
Dywedodd Prif Weithredwr ICE Cymru, Keith Jones: "Mae'r ymgyrch yn hybu cyfraniad peirianneg sifil i gymdeithas ac rydym yn falch o fod wedi datblygu'r ymgyrch hon yng Nghymru."
Bydd yr ymgyrch yn cael ei lansio ger safle'r cynllun amddiffyn arfordirol yn Y Rhyl, sydd wedi costio £8.25m ac yn mynd i leihau'r perygl o lifogydd i dros ddwy fil o gartrefi a dros 500 o fusnesau.
Yn ôl y Gweinidog Amgylchedd, John Griffiths, mae llifogydd ac erydiad arfordirol yn broblem gynyddol yng Nghymru a bydd angen rhagor o brosiectau tebyg i'r un yn Y Rhyl.
"Byddwn angen rhagor o beirianwyr sifil medrus yng Nghymru i geisio datblygu'r gwaith pwysig hwn. Dyna pam rwy'n hapus i gefnogi'r ymgyrch hon gan yr ICE i hybu peirianneg fel dewis gyrfa ac i danlinellu sut mae gwaith fel y cynllun amddiffyn arfordirol yn Y Rhyl yn dangos pa mor hanfodol yw peirianwyr i ddyfodol Cymru."
Straeon perthnasol
- 11 Rhagfyr 2010