Myfyriwr i apelio yn erbyn dedfryd o garchar am sylwadau ar Twitter

Fe wnaeth Liam Stacey gyfadde' i drosedd o dan y drefn gyhoeddus

Fe fydd apêl myfyriwr yn erbyn dedfryd o garchar am wneud sylwadau ffiaidd â chymhelliad hiliol ar wefan Twitter yn cael ei glywed yn yr Uchel Lys yn Abertawe ddydd Gwener.

Ddydd Mawrth cafodd Liam Stacey, 21 oed o Bontypridd, ei garcharu am 56 niwrnod ar ôl cyfadde i wneud sylwadau ar y wefan am Fabrice Muamba.

Pe bai Stacey yn llwyddiannus yn ei apêl, fe fydd yn cael ei ryddhau yn syth.

Fe fydd yr apêl yn yr Uchel Lys o flaen y barnwr Mr Ustus Wyn Williams yn Llys y Goron Abertawe.

Mae disgwyl i'r gwrandawiad bara tua awr.

Cafodd Stacey ei arestio wedi i ddefnyddwyr eraill y wefan ddweud wrth yr heddlu.

Daeth ei sylwadau ar ôl i bêl-droediwr Bolton Wanderers gael ei gludo i'r ysbyty wedi i'w galon stopio yn ystod y gêm rhwng Bolton a Tottenham Hotspur yn ystod gêm gogynderfynol Cwpan yr FA ar Fawrth 17.

Mae'r chwaraewr 23 oed, yn parhau mewn cyflwr difrifol yn yr ysbyty.