Swydd i ddiogelu iaith unigryw gogledd Sir Benfro

Mair Garnon James Image copyright (C) British Broadcasting Corporation
Image caption Un sy'n siarad yr dafodiaith er ei bod dros ei 80 oed, yw Mair Garnon James

Mae Menter Iaith Sir Benfro yn chwilio am swyddog i gofnodi a hyrwyddo'r dafodiaith leol.

Mae'r dafodiaith yn unigryw gyda geiriau fel 'perci', 'mini' a 'feidir' o bosib yn ddieithr i weddill Cymru.

Ond mae'r geiriau yn cael eu defnyddio yn gyson ar lafar yn ardal y 'wes wes.'

Gobaith y fenter iaith leol yw cofnodi a throsglwyddo'r cyfoeth ieithyddol i'r genhedlaeth nesaf drwy benodi swyddog tafodiaith am gyfnod o ddwy flynedd.

Nid oes modd chwarae darnau sain a fideo ar eich dyfais
Aled Scourfield yn holi Mair Garnon James am ei thafodiaith

"Mae'r geiriau mwya' anghyfarwydd yn dechrau diflannu o bosib," meddai Rhidian Evans, prif swyddog y fenter iaith.

"Rydym yn clywed geiriau fel 'dwê' a 'wêr' yn gyson.

"Ond mae 'na stôr o eiriau, i un ardal benodol efallai, sydd mewn perygl ac mae'n bryd eu diogelu.

"Dyma gyfle i gydweithio gyda phobl yr ardal gan fod tafodiaith ar drai am nifer o ffactorau, dylanwad cyfryngau a mewnlifiad er enghraifft."

O ganlyniad fe fydd geiriau ac ymadroddion 'dwê' yn cael eu diogelu a'u defnyddio yn y dyfodol.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.