Jonathan Pryce yn noddi sinema ym Mhrestatyn

Jonathan Pryce Image copyright (C) British Broadcasting Corporation
Image caption Roedd tad Jonathan Pryce yn löwr yn ardal Treffynnon

Mae un o sêr y ffilmiau, Jonathan Pryce, wedi dod yn noddwr sinema'r Scala ym Mhrestatyn, Sir Ddinbych.

Mae Mr Pryce yn dod yn wreiddiol o Garmel ger Treffynnon ac ef yw'r person cyntaf i fod yn noddwr i'r sinema, sydd hefyd yn ganolfan y celfyddydau.

Dywedodd rheolwr y Scala, Chris Bond, y gobeithiai y byddai Mr Pryce yn dod i Brestatyn i gynnal sesiynau holi ac ateb.

Dywedodd hefyd ei bod wrth ei fodd bod Mr Pryce wedi cytuno i fod yn noddwr.

"Mae'n dweud ei fod yn awyddus iawn i ddod i'r Scala," meddai Mr Bond.

"Mae gennym bobl sydd yn gwneud ffilmiau yma a dywedodd yr hoffai ein helpu mewn unrhyw ffordd y medrai."

Mae Jonathan Pryce, a gafodd y CBE yn 2009, wedi cael ei ddisgrifio yn un o actorion mwyaf amlochrog Prydain.

Cafodd ei eni ym 1947 a'i fagu yn Nhreffynnon, Sir y Fflint, lle roedd ei dad, a oedd yn gyn löwr, yn rhedeg siop.

Chwaraeodd ran Elliot Carver yn Tomorrow Never Dies ym 1997, a hefyd tad Keira Knightley yn Pirates of the Caribbean.

Straeon perthnasol

Hefyd ar y BBC

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.