Talu'n hirach i groesi'r pontydd

Ail Bont Hafren Image copyright (C) British Broadcasting Corporation
Image caption Mae angen casglu £33 miliwn cyn daw'r cytundeb i gynnal y ddwy bont i ben

Mae'r cwmni sy'n gyfrifol am y ddwy bont Hafren wedi cael caniatâd i gasglu tollau am bum mis ychwanegol.

Mae hyn yn golygu na fydd y pontydd yn trosglwyddo'n ôl i ofal y llywodraeth tan 2017 ar y cynhara'.

Mae Severn River Crossings wedi gwneud colledion am ddwy flynedd yn olynol, gan ddweud fod llai yn croesi'r dyddiau hyn.

Mae angen casglu £33 miliwn cyn daw'r cytundeb i gynnal y ddwy bont i ben.

£6.00

Fe ddaeth pris newydd i yrwyr groesi'r ddwy bont dros Afon Hafren i rym ar Ionawr 1 2012.

Mae'r newidiadau yn ddigwyddiad blynyddol, sy'n cyd-fynd â Deddf Pontydd Hafren 1992.

I geir roedd 'na gynnydd o 30 ceiniog wrth iddyn nhw orfod talu £6.00.

Mae gyrwyr faniau yn talu 60 ceiniog yn fwy sef £12.10 a gyrwyr lorïau trymion wedi gweld cynnydd o 90 ceiniog, i £18.10.

Mae'r Ddeddf Seneddol 1992 yn nodi bod rhaid i Ail Bont Hafren, a gostiodd £380m, gael ei hariannu yn breifat yn hytrach na drwy drethi.

Mae tollau ar y bont gyntaf wedi bod mewn grym er 1966.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.