BBC Cymru Fyw

Dan Biggar yn debygol o aros gyda'r Gweilch

Published
image copyrightHuw Evans picture agency
image captionMae Biggar wedi ennill naw cap dros Gymru
Bydd maswr Y Gweilch, Dan Biggar, yn debygol o wrthod unrhyw gynnig i adael y rhanbarth yn ôl hyfforddwr y blaenwyr, Jonathan Humphreys.
Mae Biggar, 22 oed, eisoes wedi gwrthod cynnig gan y clwb o Ffrainc Racing Metro 92 ac mae'r Gweilch yn gobeithio y bydd yn chwarae iddyn nhw am flynyddoedd eto.
"Does dim dwywaith na fydd Dan yn gadael," meddai Humphreys.
"Mae'n wir i ddweud fod timau ar ei ôl, ond mae gan Dan gytundeb gyda ni ac mae e'n hapus iawn yma."

Pwysau ariannol

Bydd y Gweilch yn colli Tommy Bowe (Ulster), Huw Bennett (Lyon), Nikki Walker (Caerwrangon) a Tom Smith (Gwyddelod Llundain) i glybiau eraill ar ddiwedd y tymor.
Mae clybiau Ffrainc wedi cymryd diddordeb mewn rhai o chwaraewyr gorau Cymru gan gymryd mantais o'r pwysau ariannol mae'r pedwar rhanbarth Cymreig yn eu hwynebu.
Ond mae Humphreys yn ffyddiog nad yw Biggar yn bwriadu gadael y Gweilch a mynnodd fod y maswr, sydd wedi chwarae naw o weithiau dros Gymru, yn rhan o'u cynlluniau tymor hir.
"Mae e'n chwarae ei rygbi gorau ers amser," meddai Humphreys.
"Mae Dan yn caru chwarae i'r rhanbarth.
"Mae ganddo gytundeb i chwarae i'r Gweilch am flwyddyn arall ac rwy'n gobeithio y bydd yma am gyfnod lawer hirach na hynny."
Chwaraeodd dros y Gweilch am y 100fed tro ddydd Sadwrn pan guron nhw'r Gleision 33-12 yng Nghynghrair y Pro12.
Biggar yw'r chwaraewr ieuengach i chwarae 100 gwaith dros y Gweilch ac mae wedi sgorio mwy o bwyntiau na neb arall i'r rhanbarth (964).
Er hynny mae rhai o ddilynwyr y Gweilch yn feirniadol ohono a bu'n rhaid i brif hyfforddwr y rhanbarth Andrew Hore ofyn i gefnogwyr rhoi'r gorau i wadio'r maswr.

Straeon perthnasol

  • Rabo Direct Pro12