Jiwbilî Diemwnt: Hwb i fusnesau

Mae cwmnïau sy'n cynhyrchu nwyddau yn gysylltiedig gyda'r digwyddiad wedi gweld cynnydd yn eu harchebion

Dywed rhai cwmnïau yng Nghymru eu bod yn disgwyl i'w helw gynyddu 20% oherwydd gŵyl y banc ychwanegol i ddathlu Jiwbilî Ddiemwnt y Frenhines.

Mae cwmnïau sy'n cynhyrchu nwyddau yn gysylltiedig gyda'r digwyddiad wedi gweld cynnydd yn eu harchebion.

Ond er y gallai rhai meysydd fel twristiaeth elwa, mae yna rybudd y gallai'r clwstwr o Wyliau Banc fod yn newidiol i'r economi.

Yn ôl Ffederasiwn Busnesau Bychain fe allai'r diwrnod ffwrdd o'r gwaith gostio £6bn i'r Deyrnas Unedig.

Platiau a mygiau

Dywed Barry Young o gwmni House and Gardens yng Nghaerdydd fod ei fusnes gwneud placiau wedi gweld cynnydd mewn gwerthiant.

"Fe wnes i sylwi bod pobl yn talu lot o ddiddordeb mewn placiau coed ar gyfer y coedwigoedd Jiwbilî Diemwnt sy'n cael eu plannu ledled y Deyrnas Unedig. Yna cefais y syniad byddai'n dda i elwa o'r peth.

"O edrych ar y llyfrau mae'n bosib gweld fod y cynnyrch wedi arwain at gynnydd o 20% i'r busnes.

Un arall sy'n cynhyrchu nwyddau yn gysylltiedig â'r achlysur yw Kate Glanville o Fethlehem Sir Gaerfyrddin.

Mae hi'n cynllunio platiau a mygiau ac wedi gweld cynnydd mewn busnes.

"Ysgolion oedd yn cysylltu â gofyn am fygiau. Roeddynt eisiau rhywbeth byddai'r plant yn gallu uniaethu ag o, a theimlo'n rhan o'r diwrnod mawr."

'Caffis bychan'

"Rwy'n cael nifer o archebion, ac roedd yr un peth yn wir y llynedd ar gyfer y Briodas Frenhinol, mae pobl am rywbeth i'w gofio am yr achlysur, ac mae'r un peth yn wir eleni."

Hwn yw'r ail flwyddyn yn olynol i bobl Prydain gael diwrnod ychwanegol o'r gwaith.

Y llynedd cafwyd Gŵyl y Banc ychwanegol i ddathlu Priodas Tywysog William a Kate Middleton.

Roedd y diwrnod ychwanegol ychydig ar ôl y Pasg, gyda nifer o bobl yn archebu gwyliau estynedig.

Ond mae Ffederasiwn y Busnesau Bychain yn rhybuddio y gallai sefyllfa debyg eleni gostio £6bn i'r economi.

"Dyma'r ffigwr mae angen edrych arno fel cost i'r economi, pe bai ni'n cael yr un sefyllfa eleni," meddai Iestyn Davies, o Ffederasiwn Busnesau Bychain Cymru.

"Mae'r ochr gynhyrchu nwyddau yn cael problem - mae'r gost yn cynyddu pan rydych yn cyflogi staff dros benwythnos Gŵyl y Banc.

"Mae hyd yn oed caffis bychan yn cael eu heffeithio - mae pobl yn hoffi tal ychwanegol am weithio Gŵyl y Banc, a dyw hynny ond yn iawn."

Ond yn ôl yr athro Brian Morgan o Ysgol Fusnes Caerdydd, mae'r broblem yn codi nid oherwydd y diwrnod ychwanegol ond oherwydd y clwstwr o Wyliau Banc.

Mae yna duedd i roi clwstwr o'r gwyliau adeg y Pasg, Mai a Mehefin - ac mae hynny'n gallu amharu ar fusnesau.

Ond pwysleisiodd mai "bach iawn iawn " yw'r effaith y bydd un diwrnod ychwanegol yn ei gael.