Prop Cymru Adam Jones yn cefnogi hawliau menywod

Adam Jones Image copyright Getty Images
Image caption Dywed Adam Jones fod trais yn erbyn menywod yn annerbyniol

Bydd prop tîm rygbi Cymru Adam Jones yn galw ar ddynion i gefnogi hawliau menywod mewn ymgyrch sy'n cael ei lansio yn y Cynulliad.

Nod Cymorth Menywod Caerdydd yw recriwtio dynion i herio trais yn y cartref, cam-drin ac anghydraddoldeb.

Mae dynion yn cael eu gwahodd i ymuno yng nghynllun addysg ac eiriolaeth Caerdydd a Bro Morgannwg.

Eisoes mae 40 o wirfoddolwyr benywaidd wedi eu recriwtio.

'Annerbyniol'

"Mae trais yn erbyn menywod yn annerbyniol," meddai prop y Gweilch sydd wedi chwarae 80 o weithiau dros ei wlad.

"Dylen ni dderbyn nad yw'r mater yn berthnasol i fenywod yn unig ond rhywbeth y dylai pawb ceisio atal.

"Rhaid inni i gyd chwarae ein rhan wrth newid ein cymunedau i sicrhau nad yw menywod ar draws Cymru yn agored i drais," meddai'r chwaraewr rygbi o Abercraf.

"Rwy'n falch i fod yn ddyn sy'n gwneud safiad o ran beth sy'n gywir ac rwy'n galw ar ddynion eraill i wneud yr un safiad."

'Ar eu hennill'

Dywedodd arweinydd y prosiect, Claudia Donati: "Mae dynion yn cydnabod eu bod wedi eu cyfyngu gormod oherwydd rôl rhyw.

"Byddan nhw ar eu hennill oherwydd mwy o gydraddoldeb a dealltwriaeth.

"Dyna pam bod y prosiect angen dynion i wneud safiad am gydraddoldeb rhyw fel bod newidiadau positif."

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.