BBC Cymru Fyw

Dechrau gorchuddio twll 12m ger ysgol yn Sir y Fflint

Published
image copyrightBen Robertson
image captionDechreuodd y gwaith yn Rhes-y-cae ddydd Mawrth
Mae'r gwaith i orchuddio twll 12 metr o hyd gafodd ei ganfod ar dir yn agos i ysgol gynradd yn Sir y Fflint wedi dechrau.
Dechreuodd arbenigwyr tyllau mwyngloddio weithio ger Ysgol Rhes-y-Cae ar Fynydd Helygain yn dilyn misoedd o arolygu'r twll.
Cafwyd hyd i'r twll ym mis Medi y llynedd, blwyddyn wedi i dwll 7 metr (23 troedfedd) o hyd ymddangos yn yr un safle.
Ni fydd penderfyniad ynghylch symud ffens sydd wedi'i osod o gwmpas y twll yn cael ei wneud tan i chwe mis arall o arolygu cael ei gyflawni.

Diogelwch y cyhoedd

Yr wythnos diwethaf cafwyd hyd i dwll bach ar dir Clwb Golff Treffynnon nid nepell o'r ysgol.
"Yn ffodus, nid yw cwympiadau tyllau mwyngloddio ar yr un raddfa ddigwyddodd yn Rhes-y-cae yn digwydd yn aml, ond mae rhai llai yn digwydd o bryd i'w gilydd," meddai Edwin Christmas o Ystâd Grosvenor sy'n berchen y tir lle mae'r twll wedi agor.
"Mae digwyddiadau fel hyn yn dangos yr angen inni reoli'r ardal yn ofalus i leihau unrhyw beryglon posib i ddiogelwch pobl sy'n defnyddio'r tir."
Dywedodd y tirfeddiannwr ei fod wedi bod yn cydweithio ag ymgynghorwyr arbenigol, yr heddlu a'r gymuned leol gan gynnwys yr ysgol a thrigolion yr ardal ers i'r twll diweddaraf agor yn Rhes-y-cae i sicrhau diogelwch y cyhoedd.
Dywed trigolion lleol fod hen dyllau mwyngloddio wedi cwympo gan agor tyllau ar Gomin Helygain yn y gorffennol.
Dywedodd Mr Christmas: "Er bod cyfarwyddyd ein harbenigwyr yn dweud nid oes unrhyw berygl sylweddol i bobl sy'n defnyddio'r tir ar Fynydd Helygain mae diogelwch pobl leol ac ymwelwyr o'r pwys mwyaf inni."
Cafodd y twll cyntaf ei orchuddio â chap concrit pwrpasol ym mis Awst 2010.

Straeon perthnasol

  • Canfod twll mawr ger ysgol