Wyth o enwogion yn dysgu'r Gymraeg o flaen y camerau

Yr wyth fydd yn ciesio dysgu'r Gymraeg yn cariad@iaith

Ymhlith yr enwogion fydd yn ceisio dysgu Cymraeg mewn cyfres newydd o cariad@iaith ar S4C y mae'r seren rygbi Gareth Thomas, y tenor Wynne Evans a'r cyflwynydd newyddion Lucy Owen.

Yn ymuno â nhw mae'r actor Robert Pugh, cyn-gystadleuydd ar yr X-Factor Lucie Jones, cyflwynydd CBeebies Alex Winters, yr actores Di Botcher a chyflwynydd Scrum V Lisa Rogers.

Fe fydd yr wyth yn cael cyfle i ddysgu'r iaith ac yn profi eu sgiliau mewn amrywiol dasgau.

Bydd cyfle i gyfarfod yr wyth mewn rhaglenni arbennig ar S4C ar Fai 23 a 24.

Yna rhwng Mai 26 a 31 fe fydd yr wyth i'w gweld yn dysgu'r iaith wrth i Nia Parry a Gareth Roberts ddod a'r diweddara yn fyw o wersyll fforest ger Cilgerran.

Yn ddyddiol fe fydd y criw yn mynychu gwersi Cymraeg dwys gyda'r tiwtoriaid Nia Parry ac Ioan Talfryn cyn profi eu sgiliau newydd mewn cyfres o dasgau ieithyddol.

'Hyder'

Y llynedd gwelwyd Josie d'Arby, Matt Johnson, Colin Charvis, Melanie Walters, Lembit Öpik, Helen Lederer, Rhys o GLC a Sophie Evans yn ceisio dysgu'r iaith.

Erbyn hyn mae Matt yn cyflwyno'r gyfres Hwb i ddysgwyr ar S4C gyda Nia Parri.

"Buaswn i wrth fy modd yn cymryd rhan eto!" meddai Matt.

"Roedd cariad@iaith yn brofiad anhygoel.

"Roedd e'n llawer mwy na rhaglen deledu, a doedd e ddim yn one off.

"Fe roddodd e'r hyder i mi barhau gyda fy ngwersi Cymraeg.

"Mae gen i deimlad fod y gyfres yma yn mynd i fod yn anhygoel."

Bydd modd dilyn y diweddara ar Twitter, Facebook a gwefan cariad@iaith.