Pryder am swyddi iogwrt

Mae'r iogwrt yn cael ei werthu mewn archfarchnadoedd led led Prydain

Mae AC wedi codi lleisio pryderon am ddyfodol safle cynhyrchu iogwrt yn Aberystwyth ar ôl i'r perchnogion ddweud fod dyfodol rhai swyddi yn y fantol.

Dywedodd Elin Jones AC ei bod yn gobeithio nad oedd cyhoeddiad dydd Mercher yn awgrym fod cwmni Lactalis yn bwriadu cau ffatri Rachel's Dairy.

Mae'r cwmni o Ffrainc wedi dweud y bydd y safle yn Aberystwyth yn parhau i gynhyrchu iogwrt..

Gwnaeth Ms Jones fynegi ei phryder ar lawr y Senedd ym Mae Caerdydd.

Cafodd y cwmni gwreiddiol ei sefydlu yn 1980au gan Rachel Rowlands a'i gŵr Gareth.

Mae Rachel's yn cyflogi 150.

Cafodd y cwmni ei werthu i Lactalis gan gwmni Dean Foods o'r Unol Daleithiau yn 2010.

Cyflogwr pwysig

Dywed perchnogion y ffatri, cwmni Lactalis o Ffrainc, eu bod yn ystyried integreiddio'r ffatri yn Aberystwyth gyda rhan arall o'r busnes.

Dydyn nhw ddim wedi dweud faint o swyddi sydd yn y fantol.

Dywedodd Ms Jones, AC Plaid Cymru, fod y cwmni yn gyflogwr pwysig yn y sector breifat yn Aberystwyth.

"Rwy'n gobeithio nad yw torri nôl ar swyddi yn awgrym fod y cwmni yn bwriadu symud o Aberystwyth," meddai Ms Jones.

"Rwyf wedi codi'r mater gyda John Griffiths, y gweinidog gyda chyfrifoldeb am ddatblygu cynaliadwy a'r amgylchedd, a gofyn iddo a fydd e'n gwneud pob ymdrech i gefnogi'r cwmni er mwyn sicrhau presenoldeb y ffatri yn Aberystwyth, ac i gefnogi unrhyw weithwyr sy'n wynebu colli eu swyddi."

Mewn datganiad dywedodd Lactalis nad oedd modd rhoi syniad ynglŷn â'r nifer o swyddi oedd yn y fantol nes eu bod wedi cynnal cyfnod o ymgynghori.

"Fe fydd yn newidiadau yn cryfhau dyfodol Rachel's, ac yn cryfhau partneriaethau busnes gyda ffermwyr lleol," meddai llefarydd ar ran y cwmni.