Glo brig ar safle'r Tŵr yn Hirwaun

Glofa'r Tŵr, Hirwaun Image copyright BBC elvis
Image caption Glofa'r Tŵr, Hirwaun

Mae'r gwaith wedi dechrau o symud glo o safle glo brig Glofa'r Tŵr yng Nghwm Cynon.

Fe gaeodd pwll glo dwfn Y Tŵr yn 2008 ond nawr mae'r gwaith wedi dechrau ar safle glo brig.

Mae disgwyl i'r safle gynhyrchu tua 6 miliwn tunnell o lo dros gyfnod o chwe blynedd.

Bydd y glo yn cael ei gludo i orsaf bŵer Aberddawan ym Mro Morgannwg.

Ar ôl i'r pwll dwfn gau fe wnaeth 240 o lowyr fuddsoddi £8,000 o'u harian diswyddo mewn cynllun ar y cyd gyda chwmni ynni Hargreaves.

Roedd rhai pobl leol yn anhapus gyda'r safle glo brig.

200 acer

Ond dywed rheolwyr y Tŵr y bydd y safle yn cael ei adfer unwaith i'r glo gael ei symud.

Cafodd cais cynllunio ar gyfer y safle glo brig sy'n 200 acer ei gymeradwyo gan Gyngor Rhondda Cynon Taf.

Y dyn tu cefn i'r cynllun yw Tyrone O'Sullivan.

Fo hefyd oedd yn arwain cais y glowyr i brynu pwll dwfn Y Tŵr pan oedd yn wynebu cael ei gau yn 1994.

Cafodd y pwll ei brynu gan 239 o lowyr yn 1995 ar gost o £2 miliwn.

Rhybuddiodd rhai arbenigwyr na fyddai'r cynllun yn gweithio, ond parhaodd y pwll ar agor am 13 o flynyddoedd.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.