Hufenfa: Uno i greu'r cwmni mwya' yn Ewrop

Gwartheg
Image caption Fe fydd dros 3 biliwn litr o laeth yn cael eu prosesu bob blwyddyn

Mae cwmni cydweithredol o ffermwyr llaeth sy'n gyfrifol am hufenfa yn Llandyrnog, Sir Ddinbych, wedi dweud bod cynnig i uno gyda grŵp mawr o Ewrop.

Deellir na fydd hyn yn effeithio ar yr 80 o swyddi ar y safle.

Dywedodd uwchswyddogion Milk Link eu bod am uno gyda chwmni Arla Foods sy'n eiddo i ffermwyr o'r Almaen, Denmarc a Sweden.

Fe fydd hyn yn creu'r cwmni mwya'r farchnad laeth yn y DU.

£2 biliwn

Os yw'r cynnig yn llwyddiannus, bob blwyddyn bydd y grŵp newydd yn prosesu dros 3 biliwn litr o laeth, tua chwarter yr hyn sy'n cael ei gynhyrchu yn y DU.

Bydd y gwerthiant dros £2 biliwn.

Tair blynedd yn ôl fe wnaeth Milk Link gymryd drosodd y ffatri yn Llandyrnog ar ôl i gwmni cydweithredol Dairy Farmers of Britain ddod i ben.

Mae gan y cwmni cydweithredol ffatri yng Nghroesoswallt hefyd.

Cymeradwyo

Os bydd uno bydd aelodau Milk Link yn rhan o un o hufenfeydd cydweithredol mwya' Ewrop.

Mae aelodau Milk Link a Bwrdd Cynrychiolaeth Arla Foods wedi cymeradwyo'r cynnig.

Yn y DU mae'r farchnad wedi ei seilio ar gynnyrch ffres a hir-oes o ran llaeth, hufen, llaeth â blas unigol, caws Cheddar, caws arbenigol, menyn a chynnyrch llaethdy.

Eisoes mae Arla Foods wedi buddsoddi £500 miliwn yn y farchnad yn y DU wrth sefydlu enwau fel Cravendale, Lurpak ac Anchor.

Ar hyn o bryd mae Arla yn adeiladu un o'r canolfannau prosesu llaeth mwya' yn y DU yn Aylesbury, Sir Buckingham.

'Cynaliadwy'

"Fe fydd y busnes mwy yn canolbwyntio ar sicrhau dyfodol cynaliadwy i'r ffermwyr," meddai Peter Lauritzen, Prif Weithredwr Arla Foods UK.

"Mae gan Arla record gref o fuddsoddi mewn adnoddau a brandiau yn y DU.

"Gyda'n gilydd, gallwn gynnig amrywiaeth eang o gynnyrch i'n cwsmer o safon uchel."

Dywedodd Neil Kennedy, Prif Weithredwr Milk Link: "Rydym yn credu'n gryf y bydd hyn yn creu llwyfan cryf ar gyfer dyfodol cynaliadwy i aelodau Milk Link.

"Mae 'na 1,600 o aelodau yn Milk Link.

"Fe fydd ein ffermwyr yn elwa ar weledigaeth hir dymor strategaeth Arla Foods."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.