Brwydr i Gymry Llundain

Morladron Cernyw (14) 21- 37 (23) Cymry Llundain

Mae Cadeirydd Cymry Llundain Bleddyn Phillips wedi dweud y byddan nhw'n gwneud eu gore glas i geisio sicrhau bod popeth posib oddi ar y cae yn ei le wrth i'r clwb obeithio am ddyrchafiad i Uwch Gynghrair Lloegr.

Nos Fercher fe wnaeth yr Alltudion ennill cymal cyntaf y gemau ail gyfle yn erbyn Morladron Cernyw 37-21.

Ond cyhoeddodd Undeb Rygbi Lloegr na fydd Cymry Llundain yn cael esgyn o'r Bencampwriaeth oherwydd nad yw'r clwb wedi cyrraedd y safonau angenrheidiol i chwarae yng Nghynghrair Aviva.

Dyw Morladron Cernyw heb wneud cais i gael chwarae yng Nghynghrair Aviva.

Roedd yr Alltudion wedi dweud y byddant yn rhannu Stadiwm Kassam gyda thîm pêl-droed Rhydychen - ond doedd hynny ddim yn ddigon da i Undeb Rygbi Lloegr.

Yn y gêm nos Fercher y Morladron aeth ar y blaen gyd chais Grant Pointer, ond tarodd yr Alltudion yn ôl gyda dwy gic gosb gan Alex Davies a chais yr un i Joe Adjowa a Nick Scott.

Er i'r Morladron gael cais gosb cyn yr egwyl, fe wnaeth dau gais i'r ymwelwyr o fewn dwy funud sicrhau'r fuddugoliaeth.

"Rydym yn hapus gyda'r canlyniad a hefyd y ffordd wnaethom chwarae, "meddai Lyn Jones, hyfforddwr Cymry Llundain.

Bydd yr ail gymal yn Stadiwm Kassam yr wythnos nesa.

Morladron

Cais: Pointer, cais gosb, Burgess

Trosgais: Cook (3)

Cymry Llundain

Cais: Ajuwa, Scott, Tonga'uiha, Lewis

Trosgais: Davies 4

Gôl Adlam: Ross

Cig gosb: Davies 2