BBC Cymru Fyw

Rownd derfynol y Pro 12: Leinster 30-31 Gweilch

Published

Roedd dau gais gan Shane Williams, wrth chwarae ei gêm olaf i'r Gweilch, yn allweddol wrth sicrhau pencampwriaeth y Pro 12 i'r Gweilch yn Nulyn ddydd Sul.

Daeth ei ail gais dri munud cyn y diwedd, gyda Dan Biggar yn cadw ei bwyll i gicio'r trosiad.

Felly llwyddodd Y Gweilch i atal Leinster rhag ennill y dwbl y tymor hwn ar ôl i'r tîm cartref ennill Cwpan Heineken yn erbyn Ulster yr wythnos diwethaf.

Roedd y Gweilch wedi ennill eu chwe gêm Pro 12 diwethaf gan gynnwys buddugoliaeth o 23-22 yn erbyn Leinster, ond bu'n rhaid iddyn nhw frwydro nôl o fod 17-9 a 30-21 i lawr i ennill y gêm hon.

Cafwyd ceisiau gan Sean Cronin ac Isa Nacewa (ddwywaith) i Leinster.

Croesodd Ashley Beck i'r Gweilch gyda Shane Williams yn ychwanegu ei ddau gais.

Ciciodd Jonathan Sexton 15 pwynt, gyda Biggar yn casglu 16 pwynt, gan gynnwys y ddau a seliodd y fuddugoliaeth.

'Mor falch'

image copyrightHuw Evans picture agency
image captionRhys Webb yn ceisio bylchu gyda Jonathan Sexton yn ceisio ei atal

"Roedd hon yn gêm anferthol, yn ddigwyddiad enfawr i'r Gweilch a dwi mor falch o'r chwaraewyr," meddai Hyfforddwr Y Gweilch, Steve Tandy.

"Mae Leinster yn dîm gwych.

"Mae'r hyn y maen nhw wedi ei gyflawni yn Ewrop dros y pedair blynedd diwethaf yn dweud y cyfan.

"Roedd natur eu gêm yn erbyn Ulster y penwythnos diwethaf yn golygu yr o'n nhw'n llawn hyder heddiw.

"Roedd chwarae o flaen eu cefnogwyr eu hunain hefyd yn fonws iddyn nhw ac wedi gwneud y dasg llawer anoddach i ni.

"Mae hon yn fuddugoliaeth wych".

Straeon perthnasol

  • Gweilch 45-10 Munster