Enwi'r fenyw fu farw wedi gwrthdrawiad yn Y Bala

Bu farw Lona Wyn Jones wedi gwrthdrawiad rhwng dau gar ar Fai 25

Mae'r heddlu wedi enwi'r fenyw fu farw wedi gwrthdrawiad difrifol ar ffordd yr A494 ger y Bala nos Wener.

Bu farw Lona Wyn Jones wedi'r digwyddiad rhwng dau gar tua 7.25pm Mai 25, tua dwy filltir y tu allan i'r Bala i gyfeiriad Dolgellau.

Mae gyrrwr car gafodd ei arestio ar amheuaeth o achosi marwolaeth drwy yrru'n beryglus wedi'r ddamwain wedi cael ei ryddhau ar fechnïaeth.

Cafodd gyrrwr y car a theithiwr arall oedd yn y car lle bu farw Ms Jones eu hanafu yn ddifrifol.

Roedd y tri yn teithio mewn car arian Ford Fiesta wnaeth droi drosodd a glanio ar y to.

Roedd y dyn oedd yn gyrru'r car arall yn gyrru car arian Vauxhall Corsa.

Mae disgwyl iddo ymddangos o flaen yr heddlu yng ngorsaf Dolgellau ar Orffennaf 6 eleni.

Dywedodd Heddlu Gogledd Cymru fod y ddau gerbyd yn teithio i'r un cyfeiriad.

Mae'r heddlu yn apelio am dystion i'r digwyddiad.