Ffordd ar gau wedi i drelar fynd ar dân yn Sir Gâr

Mae un o brif ffyrdd Sir Gâr ar gau i'r ddau gyfeiriad wedi i ddiffoddwyr ddiffodd tân mewn trelar.

Cafodd dau griw Gwasanaeth Tân ac Achub Canolbarth a Gorllewin Cymru o Lanwrtyd a Llanymddyfri eu galw am 12.23pm ddydd Llun i ddelio â'r tân ger Cynghordy.

Er bod y tân wedi ei ddiffodd erbyn 7pm mae'r ffordd yn parhau ar gau.

Dywed Traffig Cymru fod y digwyddiad yn effeithio ar yrwyr sy'n teithio rhwng Llanymddyfri a Llanwrtyd.

O ganlyniad mae traffig yn cael ei ddargyfeirio 50 milltir i osgoi'r ardal.

Chafodd neb eu hanafu gan y tân.