'Teulu gŵr yn bygwth mam ar gyhuddiad o ladd ei mab'

Cafodd corff Yaseen, saith oed, ei ddarganfod wedi tân yn ei gartref

Mae llys wedi clywed bod teulu ei gŵr wedi bygwth menyw cyn iddi gyfaddef ei bod wedi llofruddio'i mab saith oed.

Dywedodd Peter Murphy, bargyfreithiwr Sara Ege, 33 oed o Dreganna, Caerdydd, nad oedd amheuaeth am anafiadau'r mab, Yaseen, ond taw'r gŵr oedd y llofrudd.

Yn Llys y Goron Caerdydd mae hi wedi gwadu cyhuddiad o lofruddiaeth ac o geisio gwyrdroi cwrs cyfiawnder.

Eisoes honnodd hi mai ei gŵr 38 oed, Yousuf Ali Ege, laddodd eu mab.

Mae'r tad wedi gwadu cyhuddiad o ganiatáu i blentyn farw drwy fethu â'i amddiffyn.

Cam-drin

Dywedodd Mr Murphy fod Mrs Ege wedi ei cham-drin "yn aml".

Roedd hi wedi bod i'r meddyg teulu sawl gwaith ac roedd meddygon wedi nodi tystiolaeth o drais yn y cartre.

Cafodd corff Yaseen ei ddarganfod wedi tân yn ei gartre yng Ngorffennaf 2010.

Clywodd y llys fod y mab wedi marw oherwydd anafiadau yr un diwrnod.

Mae'r achos yn parhau.