Pencadlys paneli solar Sharp i symud i Gymru?

Mae'r ffatri yn Llai yn cyflogi 500 o bobl

Mae disgwyl i gwmni sy'n cynhyrchu paneli solar gyhoeddi ei fod yn symud ei bencadlys Ewropeaidd o Hamburg yn Yr Almaen i Wrecsam.

Fe allai cwmni Sharp Solar, sy'n cyflogi 500 yn Llai, gadarnhau'r buddsoddiad yr wythnos hon mewn cynhadledd yn Munich.

Daeth y stori i'r amlwg ar ôl adroddiadau ym mhapurau newydd sy'n arbenigo mewn masnach.

Dyw hi ddim yn glir a fydd newid lleoliad y pencadlys yn creu mwy o swyddi yn Wrecsam.

Gwnaed cais i Sharp am sylw.

Yn ôl adroddiadau mae Andrew Lee, rheolwr cyffredinol adran masnachu solar Sharp, wedi dweud wrth wefan BusinessGreen, y byddai symud y pencadlys yn creu "canolfan rhagoriaeth" ar gyfer solar yn y Deyrnas Unedig.

Yn ogystal â'r safle cynhyrchu yn Wrecsam mae gan Sharp labordy ymchwil yn Rhydychen.

Ar ddechrau 2011 fe gyhoeddodd Sharp y byddai cynllun buddsoddi £30 miliwn yn safle llai yn creu 300 o swyddi newydd.

Mae 'na adroddiadau hefyd bod Cyngor Wrecsam a Llywodraeth Cymru yn paratoi datganiadau cyn diwedd yr wythnos.