Angladd capten o gatrawd y Cymry Brenhinol

Ymunodd y capten Healey â'r fyddin yn 2007 ac fe gafodd ei gysylltu â Bataliwn Cyntaf y Cymry Brenhinol yn 2008.

Cafodd angladd milwr o gatrawd y Cymry Brenhinol a gafodd ei ladd yn Afghanistan ym mis Mai yn cael ei gynnal yng Nghaerdydd.

Bu farw y capten Stephen James Healey, 29 oed, o Gaerdydd wedi i ddyfais ffrwydro ger y cerbyd yr oedd e'n teithio ynddo yn Nhalaith Helmand ar Fai 26.

Cafodd gymorth cyntaf cyn cael ei gludo i ysbyty milwrol yn Camp Bastion lle cadarnhawyd ei farwolaeth.

Ymunodd y capten Healey â'r fyddin yn 2007 ac fe gafodd ei gysylltu â Bataliwn Cyntaf y Cymry Brenhinol yn 2008.

'Swyddog milwrol gwych'

Cyn graddio mewn Gwyddorau Chwaraeon o Brifysgol Abertawe roedd yn un o brentisiaid Clwb Pêl Droed Abertawe.

Yn yr angladd yn Eglwys Babyddol Sant Cadoc, Llanrhymni, fe gafwyd anrhydeddau milwrol llawn.

Dywedodd ei bennaeth milwrol, yr is-gyrnol Stephen Webb MC, y byddai'r capten Healey yn cael ei gofio fel "un o'r arweinwyr mwyaf proffesiynol a charismataidd gafodd unrhyw un ohonom y fraint o wasanaethau â nhw."

"Roedd yn swyddog milwrol gwych ac unigolyn heb ei ail."

Roedd y Capten Healey hefyd yn codi arian ar gyfer elusennau ac ym mis Chwefror eleni fe gerddodd o Gaer i Landudno gyda mwgwd dros ei lygaid i godi arian i gyn-filwyr sydd wedi cael eu dallu.

Enwyd y capten Healey mewn adroddiadau yn 2009 yn dilyn ei weithredoedd pan oedd yn gwasanaethu yn Afghanistan.

Yn 2010 fe siaradodd am y profiad o oroesi digwyddiad pan gafodd y cerbyd roedd yn teithio ynddo ei daro gan ddyfais ffrwydrol.

Mae'r capten Healey yn gadael ei rieni, John a Kerry, ei frawd Simon a chariad Thea.