Angen 'ymdrech sylweddol' i gyrraedd targed o leihau nifer ysmygwyr
Image copyright
PA
Mae 27,000 o bobl yn gorfod cael triniaeth mewn ysbyty oherwydd effaith ysmygu pob blwyddyn, yn ôl Iechyd Cyhoeddus Cymru.
Mewn adroddiad ar y cyd â Llywodraeth Cymru maen nhw hefyd yn nodi pryderon bod un o bob chwech o ferched beichiog yn ysmygu , y ffigwr ucha' ar gyfer y DU.
Mae'r adroddiad yn nodi bod angen "ymdrech sylweddol" ar weinidogion i gyrraedd eu targed o leihau nifer yr ysmygwyr yng Nghymru erbyn 2020.
Yn ôl amcangyfrif Iechyd Cyhoeddus Cymru a Llywodraeth Cymru roedd 23% o oedolion yn ysmygu yn 2010.
Maen nhw am leihau hynny i 16%.
Dywedodd prif swyddog meddygol Cymru bod gostyngiadau o'r fath wedi eu cyrraedd mewn gwledydd tramor.
Yn ôl yr adroddiad a gyhoeddwyd ddydd Mercher, Tybaco ac Iechyd yng Nghymru, mae nifer y rhai sy'n ysmygu ers 1978 wedi gostwng.
Ymateb lleol
Y pryd hynny roedd 40% o bobl Cymru yn ysmygu.
Ond mae graddfa'r gostyngiad wedi arafu yn ystod y blynyddoedd diweddar.
Mae Ash Cymru yn galw am gynllun blynyddol i gyrraedd y targed a mwy o gyfrifoldeb yn cael ei roi ar lefel lleol mewn ardaloedd difreintiedig lle mae mwy yn ysmygu.
"Mae'r raddfa mewn ardaloedd fel Merthyr Tudful a Blaenau Gwent yn gorfod lleihau," meddai Elen de lacey, Prif Weithredwr Ash Cymru.
"Mae angen ateb gofynion Cymru gyfan ond mae angen i bob ardal gymryd cyfrifoldeb ."
Fe wnaeth alw hefyd am darged tymor canol o 2015 gan fod 2020 yn "bell bell i ffwrdd".
Dywedodd Dr Judith Greenacre o Iechyd Cyhoeddus Cymru, bod yr ystadegau yn "achos pryder gwirioneddol".
Eglurodd bod ysmygu wedi achosi dros 5,000 o farwolaethau yng Nghymru bob blwyddyn.
"Mae'n cael effaith sylweddol ar unigolion sy'n ysmygu, ar eu teuluoedd ac ar blant.
"Mae'r strategaeth yn symud yn y ffordd gywir," ychwanegodd.
| Y rhai sydd dros 16 oed sy'n ysmygu | |
|---|---|
| Cyngor | Canran |
| Abertawe | 22 |
| Blaenau Gwent | 28 - yr ucha' |
| Bro Morgannwg | 21 |
| Caerdydd | 23 |
| Caerffili | 24 |
| Caerfyrddin | 23 |
| Casnewydd | 25 |
| Castell-nedd Port Talbot | 26 |
| Ceredigion | 23 |
| Conwy | 22 |
| Dinbych | 23 |
| Fflint | 21 |
| Gwynedd | 24 |
| Merthyr Tudful | 26 |
| Mynwy | 19- yr isa' |
| Penfro | 23 |
| Pen-y-bont ar Ogwr | 22 |
| Powys | 23 |
| Rhondda Cynon Taf | 27 |
| Torfaen | 26 |
| Wrecsam | 26 |
| Ynys Môn | 24 |