Gareth Bale yn arwyddo cytundeb newydd gyda Tottenham

Ymunodd Bale â Tottenham o Southampton ym Mai 2007 pan dalodd Spurs £5m amdano

Mae'r Cymro Gareth Bale wedi arwyddo cytundeb pedair blynedd gyda Tottenham Hotspur, medd y clwb.

Fe fu dyfalu y byddai'r asgellwr 22 oed yn cael ei hudo gan un o glybiau mawr Ewrop ond mae wedi arwyddo i Spurs tan 2016.

Dywedodd: "Mae'r clwb yn gwneud cynnydd a dwi am fod yn rhan o hynny.

"Felly dwi wrth fy modd yn arwyddo cytundeb.

'Mwynhau'

"Dwi wedi bod yma am bum mlynedd ac wedi mwynhau pob munud.

"Dwi'n dwlu ar y clwb a'r cefnogwyr".

Ymunodd â Tottenham o Southampton ym Mai 2007 pan dalodd Spurs £5m amdano.

Ym mis Hydref cafodd ei enwi'n Bêl-droediwr Gorau Cymru am yr ail flwyddyn yn olynol.

Mae BBC Cymru yn deall bod Bale yn un o bedwar Cymro yng ngharfan Team GB ar gyfer y Gemau Olympaidd.