Y Scarlets yn arwyddo Gareth Owen

Mae'r Scarlets wedi arwyddo cyn-olwr y Gweilch Gareth Owen ar drothwy tymor 2012-13.

Nid oedd Owen, 23 oed, yn gallu chwarae i'r Gweilch y tymor diwethaf wedi iddo gael triniaeth ar ei ben-glin.

Dywedodd yr olwr pob safle o Ben-y-bont ar Ogwr ei fod yn edrych ymlaen at chwarae i'r Scarlets y tymor nesaf.

Mae Owen, chwaraeodd 50 o weithiau i'r Gweilch, yn gallu chwarae fel mewnwr, canolwr neu gefnwr ac mae wedi cynrychioli Cymru o dan 19 oed ac o dan 20.

'Yn dalentog'

Dywedodd hyfforddwr ymosodol y Scarlets, Mark Jones: "Mae'n chwaraewr talentog, amryddawn fydd yn gallu cynnig opsiynau ymosodol i ni."

Fe yw ail gyn-chwaraewr y Gweilch sydd wedi ymuno â'r Scarlets ar gyfer y tymor nesaf ac mae'n dilyn ôl troed yr asgellwr Kristian Phillips.

Yn ddiweddar, mae'r Scarlets wedi arwyddo'r clo o'r Ariannin, Tomás Vallejos, a'r clo o dde Affrica, George Earle.