Jamie Baulch: Dai Greene yn barod i ennill medal aur

Dai Greene a Javier Culson Image copyright Getty Images
Image caption Dydi Dai Greene ddim wedi curo Javier Cuslon eleni

Gyda'r Gemau Olympaidd yn cychwyn ddiwedd yr wythnos mae cyn enillydd medal arian yn y Gemau wedi dweud y gall y Cymro Dai Greene gipio'r fedal aur yn ras 400 metr dros y clwydi.

Mae Jamie Baulch yn grediniol y bydd Greene yn gwella'n raddol i guro Javier Culson am y tro cynta' eleni.

Dywedodd y Cymro Baulch, pencampwr byd, fod Greene, 26 oed, yn y "safle gorau posib" ar gyfer y Gemau.

"Petawn i'n mynd i bencampwriaeth a bod y pencampwr byd yn agosáu ac yn gwella bob ras, fe fuaswn i'n nerfus," meddai'r gŵr enillodd fedal arian yn y Gemau yn 1996 yn y ras gyfnewid 4x400m.

Fe lwyddodd Greene i guro Culson o Puerto Rica ym Mhencampwriaeth y Byd yn Daegu, De Korea ym mis Medi 2011.

Ond cafodd Greene lawdriniaeth ar ei ben-glin dros y gaeaf ac ers hynny mae o wedi bod yn gysgod i Culson.

Meddwl cryf

Mae Culson wedi rhedeg y pum amser gorau o'r saith eleni wrth i Greene gymryd y ddau arall.

Amser gorau Culson yw 47.72, a redodd yn 2010, tra bod amser gorau Greene wedi ei gofnodi yn gynharach yn y mis ym Mharis (47.84).

Fe wnaeth Culson gofnodi ei amser gorau eleni wythnos ar ôl y bencampwriaeth ym Mharis, 47.78, yn Crystal Palace.

Ond dywed Baulch mai Greene fydd yn ennill y fedal aur.

"Mae o mewn sefyllfa wych, yn gryf yn feddyliol a chorfforol," meddai.

"Mae'n beth da bod 'na gystadleuaeth i Greene.

"Bydd Greene yn wych dros y tair rownd tra bod Culson yn dda mewn un ras."

Un o wrthwynebwyr Greene fydd y Cymro Rhys Williams.

"Fel y gwelwyd, mae Greene yn gwella ym mhob ras.

"Gyda Culson...mae'n gwella, ond dim cymaint ag y mae Greene yn ei wneud.

"Croesi bysedd a bydd y fedal aur am wddf Greene."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.