Dyffryn Nantlle: Noson gyfan i achub dringwyr

Cafodd timau achub eu galw i Gwm Silyn tua 9pm nos Sul

Fe dreuliodd timau achub mynydd noson gyfan yn ceisio achub dau ddringwr oedd wedi mynd i drafferthion yn Nyffryn Nantlle.

Cafodd 12 aelod o dîm Aberglaslyn ac eraill o dîm Llanberis eu galw i Graig yr Ogof, Cwm Silyn tua 9:00pm nos Sul.

Roedd dyn a dynes yn dweud eu bod wedi mynd i drafferthion ac yn methu dringo i fyny nac i lawr o'r graig lle oedden nhw.

Troi'n ôl

Fe anfonodd yr Awyrlu hofrennydd Sea King ond oherwydd gwyntoedd cryfion a chymylau isel bu'n rhaid iddi droi'n ôl.

Bu'r timau achub wedyn yn gweithio trwy'r nos i geisio cyrraedd y dringwyr a llwyddo i'w hachub tua 6:00am ddydd Llun.

Dywedodd aelod o dîm Aberglaslyn fod y ddau yn ddringwyr profiadol a bod eu hoffer yn addas.

Chafodd neb ei anafu.