BBC Cymru Fyw

Dafydd Elis-Thomas yn 'gwerthfawrogi' cael y chwip yn ôl

Published
image captionRoedd yr Arglwydd Elis-Thomas wedi dweud y byddai'n dadlau ei achos gerbron gwrandawiad petai angen

Mae'r Arglwydd Dafydd Elis-Thomas wedi ymateb yn gyhoeddus am y tro cyntaf i ddatganiad Arweinydd Plaid Cymru ddydd Gwener.

Yr wythnos diwethaf collodd Aelod Cynulliad Dwyfor Meirionnydd chwip y blaid am iddo beidio mynychu pleidlais o ddiffyg hyder yn y Gweinidog Iechyd, Lesley Griffiths.

Wrth ddweud ddydd Gwener bod yr aelod wedi cael y chwip yn ôl fe wnaeth Leanne Wood ddweud ei bod am i'r mater ddod i ben ac nid oedd yn dderbyniol fod datganiadau'n cael eu gwneud i'r wasg cyn eu rhannu gyda thîm y blaid.

"Does dim dwywaith, mae digwyddiadau'r dyddiau diwethaf wedi bod yn niweidiol i Blaid Cymru a hefyd i'r ymgyrch i gael trafodaeth dryloyw a gonest - ac atebolrwydd - wrth i ni ystyried dyfodol ein Gwasanaeth Iechyd.

"Er mod i'n anghytuno â fe, rydw i'n parchu'r ffaith nad yw Dafydd Elis-Thomas yn rhannu safbwynt y grŵp - a safbwynt y grŵp ers tro - ar ddiogelu gwasanaethau iechyd craidd ar lefel gymunedol a'r angen am atebolrwydd gweinidogol am y penderfyniadau sy'n cael eu gwneud."

'Cefnogaeth'

Wrth gael ei holi ar Post Cyntaf Radio Cymru o'r Sioe Frenhinol ddydd Mercher dywedodd yr Arglwydd Elis-Thomas ei fod yn gwerthfawrogi'r ffaith bod y chwip wedi ei roi yn ôl.

Dywedodd hefyd ei fod yn ddiolchgar iawn am y gefnogaeth a dderbyniodd o bob cwrs o Gymru wedi'r gwaharddiad, sy'n gysur iddo.

"Dwi'n gwerthfawrogi'n fawr y datganiad wnaeth hi.

"Dwi'n mynd i ddal i edrych i'r dyfodol a gweld sut allwn ni gydweithio yn well yn y Cynulliad.

"Dwi wedi dweud sawl tro fy mod yn meddwl ei bod yn bwysig bod Plaid Cymru yn cyfrannu yn greadigol at Lywodraeth Cymru a'r Cynulliad."

Straeon perthnasol

  • 'Cefnogaeth lwyr' i Dafydd Elis-Thomas