Team GB 1-0 Uruguay

Daniel Sturridge sgoriodd unig gôl y gêm

Team GB 1-0 Uruguay (Dynion)

Roedd cyfraniad y Cymry yn nhîm pêl-droed Prydain nos Iau yn amlwg iawn wrth iddynt gyrraedd rownd yr wyth olaf gan guro Uruguay 1-0.

Bydd tîm pêl-droed Prydain yn awr yn herio De Korea yn y rownd gogynderfynol yn Stadiwm y Mileniwm ddydd Sadwrn.

Fe ddaeth unig gôl yr ornest i Daniel Sturridge wedi 44 munud o'r gêm.

Roedd Joe Allen yn allweddol yn creu'r symudiad er mwyn i Sturridge rwydo.

Cychwynnodd pedwar o'r pum Cymro yn y garfan y gêm ac roedd capten tîm Prydain, Ryan Giggs, ar y fainc.

Ergyd nerthol

Ddwy funud wedi dechrau'r ail hanner fe wnaeth Bellamy groesi'n gelfydd at Sturridge yn y cwrt cosbi wnaeth fethu â chyfle euraid i ddyblu'r fantais.

Saith munud yn ddiweddarach methodd capten tîm Uruguay, Luis Suarez ag unioni'r sgôr pan arbedodd golwr tîm Prydain, Jack Butland gyda'i goesau.

Cafodd Bellamy ei eilyddio wedi 71 munud a daeth chwaraewr Tottenham, Danny Rose, i'r maes.

Tarodd Ramirez y postyn gydag ergyd nerthol o du allan y cwrt cosbi ym munud ola'r gêm ac arbedodd Butland gic gosb gan Suarez funud yn ddiweddarach ond ofer fu ymdrechion Uruguay wrth i dîm pêl droed Prydain gyrraedd y rownd gogynderfynol.

Yn y gêm arall gafodd ei chwarae yn Stadiwm y Mileniwm nos Fercher fe gurodd Mecsico Y Swistir 1-0.

Team GB: Butland, Richards, Taylor, Caulker, Bertrand, Cleverley, Allen, Ramsey, Sinclair, Bellamy, Sturridge.

Eilyddion: Steele, Rose, Dawson, Giggs, Tomkins, Cork, Sordell.

Uruguay: Campana, Arias, Coates, Rolin, Ramirez, Aguirregaray, Rodriguez, Viudez, Arevalo Rios, Suarez, Cavani.

Eilyddion: Gelpi, Polenta, Albin, Calzada, Hernandez, Urreta, Lodeiro.

Dyfarnwr: Yuichi Nishimura (Japan)