Medal arian i Hannah

Hannah Mills
Image caption Ar frig y don: Hannah Mills ddydd Gwener

Cafodd Cymru fedal arian ddydd Gwener wrth i Hannah Mills o Ddinas Powys gystadlu yn yr Hwylio (Dosbarth 470) gyda'i phartner Saskia Clark.

Yn Weymouth roedd y ddwy'n gyfartal ar bwyntiau gyda Seland Newydd fore Gwener wedi cyfres o ddeg ras ond ni lwyddon nhw i drechu Seland Newydd.

Enillodd Mills bencampwriaeth y byd gyda Saskia Clark ddeufis cyn y gemau yn Llundain - y menywod cyntaf o Brydain i ennill medal aur yn y dosbarth 470.

Yn gyn bencampwr ieuenctid y byd, dechreuodd Mills ei phartneriaeth gyda Clark yn Chwefror 2011, ac o fewn dim roedd y ddwy wedi ennill medal efydd Ewropeaidd a medal arian ym Mhencampwriaeth y Byd.

'Hwb'

Dywedodd Dr Huw Jones, Prif Weithredwr Chwareon Cymru: "Mae'r hyn mae Hannah wedi ei gyflawni'n hwb i'r campau yng Nghymru, yn enwedig campau menywod.

"Ac mae'n dangos bod gwaith caled ac ymroddiad yn gallu eich codi o lefel clwb hwylio lleol i'r lefel ucha' bosib.

Dywedodd Steven Morgan, Prif Weithredwr Cymdeithas Hwylio Cymru: "Yn sicr, mae Hannah a Saskia wedi cyflawni cymaint mewn cyn lleied o amser.

"Mae dod yn bencampwyr y byd ac ennill medal Olympaidd yn yr un flwyddyn yn gamp enfawr."

Dywedodd fod Hannah'n "ysbrydoliaeth i'r genhedlaeth nesa' o hwylwyr."