Pontydd Hafren: Rhoi'r gorau i gynllun gweithio i reol

Ail Groesfan Hafren [Llun: Terry Winter] Image copyright Other
Image caption Mae'r cwmni wedi dweud bod rhaid cadw'r pontydd ar agor hyd yn oed yn ystod streic.

Mae staff sy'n casglu tollau ar ddwy bont Hafren wedi rhoi'r gorau i'w bwriad i weithio i reol o ddydd Mawrth nesaf.

Ond mae cynlluniau i gynnal streic 24 awr ar ddechrau Gŵyl y Banc y penwythnos nesaf yn dal ar y gweill.

Er hynny mae swyddogion undeb Unite yn dweud eu bod yn hyderus eu bod yn agos i ddod i gytundeb â chwmni Croesfannau Afon Hafren.

Mae Croesfannau Afon Hafren wedi dweud bod rhaid cadw'r pontydd ar agor hyd yn oed yn ystod streic.

Streic

Bydd y trafodaethau yn ail-ddechrau'r wythnos nesaf.

Ym mis Gorffennaf pleidleisiodd tua 70 o staff o blaid gweithredu'n ddiwydiannol oherwydd ffrae am newid shifftiau.

"Cynigiodd y cwmni newidiadau i shifftiau ond doedd dim cydbwysedd rhwng gwaith ac ansawdd bywyd y tu allan i'r gwaith," meddai swyddog rhanbarthol yr undeb, Jeff Woods:

"Rydyn ni a'r cwmni yn hyderus ein bod yn agos i daro cytundeb yn dilyn cyfarfod positif heddiw.

"Mae ein bwriad o weithredu'n ddiwydiannol, gwahardd gweithio oriau ychwanegol a gweithio i reol o ddydd Mawrth wedi cael eu gohirio gan obeithio y byddwn ni'n datrys yr anghydfod erbyn dydd Mercher."

Ychwanegodd fod y cynllun i gynnal streic ar Ddydd Gwener 24 Awst yn dal mewn lle.

Nid oedd unrhyw un o gwmni Croesfannau Afon Hafren ar gael i wneud sylw ar y mater.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.