Dicter yr heddlu am ddwyn metel
Image copyright
(C) British Broadcasting Corporation
Dylai'r cyhoedd wylltio bod ysgolion ac adeiladau cymunedol yn cael eu targedu gan ladron metel, yn ôl yr heddwas sydd yng ngofal taclo'r drosedd.
Dywed yr Uwch-Arolygydd Simon Clarke o Heddu'r De bod y lladron yn cael effaith ar y bobl mwyaf bregus.
Ddydd Iau cafodd rhan o'r to yn Ysgol Gynradd Tonypandy ei ddwyn, gan achosi gwerth tua £20,000 o ddifrod.
"Rwyf mor rhwystredig a dig," meddai wrth BBC Cymru.
"Rydym yn gweithio'n agos gyda'r gymuned, cynghorau, aelodau o'r gwasanaeth iechyd, cwmnïau dŵr a thrydan a nwy ac ati ynghyd â'r Eglwys yng Nghymru i geisio diogelu adeiladau.
"Ond yn amlwg nid yw'r neges yn cael ei chlywed.
Rhywun yn gwybod
"Yr hyn y byddwn yn ei ddweud yw nad oes gan y bobl sy'n cyflawni'r troseddau yma unrhyw foesau oherwydd maen nhw'n cael effaith ar y bobl mwyaf bregus yn ein cymunedau."
Dywedodd Mr Clarke bod mesurau gan gynnwys cynnydd mewn teledu cylch cyfyng a chynnyrch marcio eiddo yn cael eu gweithredu.
Ond ychwanegodd: "Rwy'n credu bod yr ateb o fewn y cymunedau, oherwydd mae rhywrai yn gwybod pwy sy'n cyflawni'r troseddau yma, ac mae angen iddyn nhw gysylltu gyda ni.
"Dylai'r cyhoedd wylltio bod ysgolion unwaith eto'ncael eu targedu."
Y llynedd, roedd ffigyrau ddaeth i law BBC Cymru yn awgrymu bod lladradau o'r fath wedi costio bron £680,000 i awdurdodau lleol yng Nghymru, oedd yn fwy na dwbwl y flwyddyn flaenorol.